Read bura-pabir Zabura 144 Bible Online

Zabura 144 - bura-pabir bible

Zabura 144

¹Ha ar Dauda. Hu gir MTHLAKU, kamnyar tsa andər mbuli ra, tsa andər thlipa ali lakur mpa, ka ɗəmhə ra kamnyar dləra.

²Tsa an mdər ɓəla ra ka mdər mbuli ra, mdər ɗuwar ra ka mdər mbantə ra, natə adzə ni antə I ana ɗuwardzi. Tsa andər hara ka mji zumzum ndzi akiri.

³MTHLAKU, mdə mə laga ri har tə ga ana damitədzi ka tsa ni, mdə ndzang, amma har ga ata damitədzi ka tsa?

⁴Mdə ndzi apa mpikəmtar mpika, virayeri arni ana təramta apa shanggur.

⁵Kəlar vəi na amtazi, MTHLAKU, kara səghəi. Tsəkwar garayeri, antə da ata hara ɗer.

⁶Thlentə wurka ka tsa titiləmta dawayeri ar nga, shə afayeri ar nga na ata titiləmta ɗa ka da hwi.

⁷Hyel na amtazi, ka gə haghəi tsiya ga akwa duniya, kara mbuli ra, ka msərantə ra akwa yimi na zurang, akwa tsiya mətəpiyayeri na thlata akwa tsəɗiyayeri damwa,

⁸mji na ana thlandəra, mji na ana pwaktə mji ka tsi mazəma ɗa.

⁹I ata hara ha bilən ala ga, Hyel, ata mnya guləm na ka suwari kuma tə I ata tsari.

¹⁰Gə na ana hamta nggyari su aka kuthlyayeri, ka mbuli buɗar nga, Dauda, ta mtər katsakar.

¹¹Mbuli ra ta katsakar na ɗimi ni, msərantə ra akwa tsiya mətəpiyayeri na thlatə akwa tsəɗiyayeri damwa, mji na ana thlandəra, ka pwaktə mdə ka tsi mazəma ɗa.

¹²Ka maɗashilər yeru hara gəna akwa kustakurər ɗa, ka da kəla ka ndzi ka duna apa nfwa na ku wutə wula. Ka maɗangkwiyir yeru ndzi dakwi dakwi apa zhimbwalayeri tə mdə dəɓata na ɓɗakɓɗaku, tə mda ana dəɓatə kuɗəmar kəi kuthlikur kəgari.

¹³Hara ka biyayeri ar yeru nghyi ka sur fakə zumzum. Hara ka təmayeri ar yeru yatədzi dəpu dəpu, har ka da hara dəpu kum kuma ata hildiyayeri ar yeru.

¹⁴Hara ka thlayeri ar yeru təksa ka mzhi fa sur fakəu. Dawayeri aɗiya sə ɓəl katanggar yeru wa, wala ka mji ka mwanta akwa mafakur wa. Mda aɗiya wutə mji akwa tuwa wala sur haptə hangkal ata kutadi ar yeru wa.

¹⁵Jiri, ata ndzi msəra aka mji na ku wutə su apani, jiri, msəra aka mji tə MTHLAKU an Hyelər ɗa!