Read bura-pabir Zabura 145 Bible Online

Zabura 145 - bura-pabir bible

Zabura 145

¹Ha ar huwa ar Dauda I ata haptə səliyir nga, gə na Hyelərna ka kuthlirna, kəi fwal thləma ga har har ba saka madi.

²Parang viri I ata usar nga, kəi fwal thləma ga har har ba saka madi.

³MTHLAKU, gə ol jiri, antə kalkal ka mdə hu nga, olkurər nga ku təramta dunar nggaɓəla sur yeru.

⁴Kəlara zaman ata sə ngkər surndatayeri ar nga aka zaman na ata nu ni, Da ata ngkər suayeri na ol'ola tə gə hara.

⁵Da ata ngkər olkur səliyir nga ka kuthlikurər nga, antə I ata dzama ata kəra surndatayeri na ol'ola tə gə hara.

⁶Mji ata sə ngkər surndatayeri ar nga na ana thlivərantə mdə ni, antə I ata sə ngkər olkurər nga aka mji.

⁷Da ata sə tuwantə thləma ga kamnyar hangkur ɓɗakkur tə ga ana hara, da ata sə hara ha ar kucali ata kəra jirkurər nga.

⁸MTHLAKU hir mda, tsuwa tsa ana kətadzə mda, ɗəffari aɗi ana ɓzi taktar wa, tsuwa tsa ka hirkur na ana palidzi wa hang.

⁹MTHLAKU ana hara ɓɗakkur aka kəlara mda, tsa ana kətadzə shanga su tə tsa namta.

¹⁰Shanga su tə gə namta, MTHLAKU, ata sə hu nga, shanga mji na hir nga ata sə usar nga.

¹¹Da ata sə ngkər səliyir kuthlikurər nga, ka ngkər dunar nga na ana ndatə mdə ni,

¹²kamnyar ka mjir duniya səndə suayeri na ol'ola tə ga ana hara, ka olkur səliyir kuthlikurər nga.

¹³Kuthlikurər nga an kuthlikur na ba saka madi, antə kuthlikurər nga ata ndzi aka shanga zamanayeri. MTHLAKU ana nghyaɓəla su tə tsa ku pəla, tsa ana hara shanga surni ka kətadza.

¹⁴MTHLAKU ana rwati shanga mji na akwa ndla, ka thlentə shanga mji na akwa ɗar bwani akira mda.

¹⁵Shanga mji ana putə nca ata ga, antə ga ana hamta ala ɗa susəma ata saka na kalkalari.

¹⁶Ga ana kəlar tsiya gə bwang, ka ndlantə kəlara su tə gə namtə ka mpika.

¹⁷MTHLAKU, ana hara shanga su ka jirkur, ka ncantə hirkur akwa shanga su tə tsa ana hara.

¹⁸MTHLAKU an kudzəhə ka shanga mji na ana hara adduwa alari ka jirkur.

¹⁹Tsa ana hamta shanga mwaɓər mji na ana thlivər ni, tsa ana nggatə tuwar ɗa ka mbantə ɗa.

²⁰MTHLAKU ana ɓəlatə shanga mji na hir ni, amma tsa ana kurəmta shanga mji na kəmanggar.

²¹I ata hu ngə, MTHLAKU, tsuwa ka shanga mji fwal thləma gə na ɓɗakkarkar har har ba saka madi.