Read bura-pabir Zabura 147 Bible Online

Zabura 147 - bura-pabir bible

Zabura 147

¹Hu gir MTHLAKU! Kamnyar ɓɗaku ka mdə hara har huwa aka Hyelər mburu, kamnyar ɓɗaku, tsuwa kalkal ka mdə hu ni.

²MTHLAKU akwa jaktə latə Urushalima, tsa akwa səvəi ka mjir Israila na aɓəla.

³Tsa ana mbantə mji na ka ɗəffə ɓzəɓza ka mbugəi mbəlka ɗa.

⁴Tsa ku ɗəmhə hangkur sasəlkayeri na ata ndzi ata hyel, ka vətə thləm aka kəlara pal akwa nca ɗa.

⁵MTHLAKU ar mburu an Ola, tsuwa tsa ka kuthlikur ka duna, mda amzhi ngkərɓəla jili su na akwa kərari wa.

⁶MTHLAKU ana haptə mji natə mdə ku rutəmta, amma tsa ana ndlagamta kəmanggarayeri ata di.

⁷Hara ha ar huwa aka MTHLAKU, tsa guləm ka kuraku na msəra aka Hyelər mburu.

⁸Tsa ana hartə vəi na amtazi ka dlambayeri, tsa ana thlentə yimərhyel aka duniya, tsa ana hara ka kusar kəla ata garayeri.

⁹Tsa ana hamta susəma aka mwaɓiyayeri, ka ndlantə maɗa' zəlaku na akwa tuwa susəma.

¹⁰MTHLAKU aɗi ana damitədzi ka dunar takwayeri wa, wala damitədzi ka ɓɗakkur səla sojayeri wa,

¹¹amma tsa ana nggatə msərakur mji na ana thlivər ni, mji na ana mbərsa ka hirkurərni na ana palidzi wa ni.

¹²Hu gir MTHLAKU, giri na akwa Urushalima! Hu gir Hyelər giri, giri na akwa Sihiyona!

¹³Kamnyar tsa ana namtə udzəm nyarfur nga ka tsa ndzi ɓəɓal, tsa ana vədzə barka aka mjir nga.

¹⁴Tsa ana hara ka msərakur wutədzi ba akwa kəla giri kəga tsəɗiyayeri, tsa ana ndlantə mjir nga ka alkama na ɓɗakta shang.

¹⁵Tsa ana thlentə tsawurni akwa duniya, antə ndərərni ana mwa taktar.

¹⁶Tsa ana hartə kəra di ka handzəkəla ka tsa ndzi shalak mwapu apa mpur puwa, ka titiləmta kəlangkəu apa pənju.

¹⁷Tsa ana pumta handzəkəlarni apa maɗa' pela. Wan ata mzhi nggitə shambarərni na mtathlaku nə ri?

¹⁸Ma tsa ku ndəra, handzəkəla ana lusamtadzi, ma tsa ku fyarar ni ka shambar arni, təng handzəkəla ni ata hwi yimi.

¹⁹Tsa ana kəlar ndərərni aka Yakub, ka hamta tsawayeri ka suayeri tə mdə thlamta aka Israila.

²⁰Tsa aɗi ɗar hara ngəni aka dur damwa wa, da aɗi səndə suayeri tə tsa thlamta ka mdə hara wa. Hu MTHLAKU!