Read bura-pabir Zabura 148 Bible Online

Zabura 148 - bura-pabir bible

Zabura 148

¹Hu gir MTHLAKU! Hu gir MTHLAKU, shanga giri na amtazi! Hu gir ni, shanga giri na akwa vəi na amta ta shang!

²Hu gir ni, shanga giri na mjirthlentərhyel! Hu gir ni, shanga giri na sojayeri arni amtazi.

³Hu gir ni, pci ka thliya! Hu gir ni, shanga giri sasəlkayeri na ana mbəla.

⁴Hu gir ni, vəyayeri na amta ta shang, ka yimayeri na amta vəyayeri na amtazi.

⁵Ka shanga ɗa fwal thləma MTHLAKU, kamnyar tsa ku hamta tsawa, antə da ku namtədzi!

⁶Antə tsa pugəi ɗa akwa vəi ndzəndziyir ɗa har har ba saka madi, ka thlamta ala ɗa kəla vəi tə da aɗi ata təramtari wa.

⁷Hu gir MTHLAKU, giri na akwa duniya, mwaɓiyayeri na ol'ola ar kutayimi ka shanga su na akwa kira yimi,

⁸wurka ka handzəkəla, ɗuza ka dlamba, ka shambar yimi na ana nu tsawurni.

⁹Hu gir ni, garayeri ka ɗəɗəgəlayeri, nfwayeri tə mda ana səma ka shanga nfur seda,

¹⁰shanga mwaɓi mtakəu ka mwaɓi kəi, mwaɓiyayeri na ana mwa ka yimər kuta ɗa ka ɗikayeri.

¹¹Hu gir ni, kuthlyayeri na akwa duniya ka shanga mji, mji ol'ola ka shanga alkaliyayeri akwa duniya,

¹²maɗadakwi ka maɗangkwi, mji ol'ola ka maɗangkyar.

¹³Ka shanga ɗa fwal thləma MTHLAKU, kamnyar thləmari ku təramta shanga thləm damwa, olkur səliyirni ku təramta na akwa duniya ka na amtazi.

¹⁴Tsa ku hara tə mjirni ndzi ka duna, kamnyar ka shanga mjirni hu ni, mjirni Israila natə tsa hirhira. Hu gir MTHLAKU!