Read bura-pabir Zabura 18 Bible Online

Zabura 18 - bura-pabir bible

Zabura 18

¹Ha ar Dauda aka mdər pwar ha. Ha ar Dauda na mafar MTHLAKU. Tsa thla ha ngəni vir tə MTHLAKU msərantə ni akwa tsiya dawayeri arni ka akwa tsiya Shawulu. I hir nga ka duna, MTHLAKU, kamnyar ga andər ni duna.

²MTHLAKU an pelar ɗuwardzərna, tsa an vəi ɗuwardzərna na ka duna, ka mdər mbuli ra. Hyelərna an pelar ɗuwardzərna natə I ana ra ɗuwardzi akwa tsa. Tsa ana mbuli ra akwa tsiya dawarna, tsa an vəi ɗuwardzərna na ka duna.

³I ana hara adduwa aka MTHLAKU, natə kalkal ka mdə fwal ni, tsa ana msərantə ra akwa tsiya dawayeri arna.

⁴Mta ku pərtə ra ka səwurni, asarayeri zumzum ku pungkərdzi ali.

⁵Səwur kula ku pərtə ra, tsuwa mta ku nggəi dərku ali.

⁶I akwa ɗar bwani, antə I ku tuwa abbər ka MTHLAKU dlar ra, jiri, I ku tuwa aka Hyelərna abbər ka tsa dlara. Antə akwa mbwar vəngkər səli alari tsa ku nggatə kurakəi, sakatə I tuwa abbər ka tsa dlar ra ni.

⁷Antə duniya ku yakata ka kədza karkar, wala nggilanga garayeri ku thlivəra ka kənggəra, kamnyar ɗəffa Hyel na ɓza.

⁸Ɗer ku səɓəla akwa kucirari, tsuwa kyanggyara u'u na akwa mba vəlvəl, ka hakthlir u'u na jwaras akwa puɓəladzi akwa mnyari.

⁹Tsa ku ntau vəi na amtazi ka səghəi, ka zhimaru na thlərətu akira səlari.

¹⁰Tsa lətə mwaɓi na ka ɓəɓəku ka fəla, ka mwa ka ufti ata ɓəɓəka shambar.

¹¹Tsa namtə kuthlu apa ləptərni, ka ɗuwar kərni akwa dlamba na kəkəsu ka yimi.

¹²Handzəkəla ka wurka na apa hakthlir u'u ku səɓəla akwa parakəu na akəmari ka ntau zhimaru na thlərətu ni.

¹³MTHLAKU ku ndəra ka duna apa dlərər hyel, antə mdə ku nggatə kuraka Hyel na ka Səli ta Shang, antə handzəkəla ka hakthlir u'u ku shir ka shira.

¹⁴Tsa ku shə afərni ka titiləmta dawayeri, ka kədləmta ɗa ka wurkərni.

¹⁵Kamnyar mpa tə ga ku hara aka dawayeri ar nga, ka kuraku tə gə harangkər ala ɗa kamnyar ɗəffa gə na ɓza, antə ga ku vu tə manda na ola ku shiwa ka ula, ka kəlar kira di ata bəbal.

¹⁶Tsa ku haghəi tsiyari akwa duniya ka kətə ra, ka ndəkərɓəla ra akwa yimi na zurang,

¹⁷Tsa msərantə ra ta dawayeri arna na ka duna, ka akwa tsiya mji na nggəlar ra, kamnyar da ɓəɓal ta iya.

¹⁸Akwa sakatə I akwa bwani, antə da pwa ata kəri ka mpa, amma MTHLAKU ku dlar ra ka mbuli ra.

¹⁹Tsa kəɓəla ra akwa asar ka msərantə ra, ka mbuli ra kamnyar tə tsa ana nggatə msərakurərna.

²⁰MTHLAKU ku ntəmta ra kamnyar su na kalkal tə I hara, tsa ana nggatə msərakurərna kamnyar jirkur tə I kəgari.

²¹I ku ɓəlatə tsawur MTHLAKU, I aɗi ndzi kəmanggar ka zhar nu Hyelərna wa.

²²I ku ɓəlatə shanga tsawayeri arni, I aɗi psəmta tsawurni wala duku wa.

²³I ku ndzi kula su tə mda ajikamnya ata kər, ka ngkatə kərna ta hara biku.

²⁴Apani antə MTHLAKU ku ntəmta ra kamnyar su na kalkal tə I hara, kamnyar tsi kəcəkəcari akəmari.

²⁵Ga ana hara ɓɗakkur aka mji na ku ndzi ka jirkur, ka ncantə hirkur na zum aka mji na kula biku.

²⁶Ga ana hara ɓɗakkur aka mji na ka ɗəffa ɗa kəcəkəcari, amma ga aɗi ana hir mji na kəmanggar wa.

²⁷Ga ana mbantə mji na ka tərghəi kər, amma ga ana kəli səliyir mjir gaya.

²⁸MTHLAKU na Hyelərna, ga ana hamta ali parakəu akwa lakurna, ka shinantə kuthlu na akəmi ka tsa ndzi parakəu.

²⁹Ga ana ni duna kəi dlərəmta dawayeri arna, ka dunar mzhi fəlvəi ata katangga bərniyir ɗa.

³⁰Hyel ngəni, tsa ana hara su kalkal! Shanga su tə tsa pəla ana ndzi jiri. Tsa ndzi apa partau aka shanga mji na ana bara ka tsa an ɓəlatə ɗa.

³¹Kamnyar MTHLAKU shini an Hyel, Hyel duku shini an ka dunar mbantə yeru.

³²Tsa an Hyel na ana dunautə ra, na ana namtə ka lakurna ndzi lapiya.

³³Tsa ana namtə səli ɓəɓatu apa jikəl, ka pwar ra har ata kəra garayeri lapiya.

³⁴Tsa ana thlipa ali lakur mpa, natə har I ata mzhi sha ka lali na ɓəɓal.

³⁵Ga ku ni partau ar nga na ana mbantə ra, ga ku dlar ra ka rwatə ra ka tsi mazəma ga, ga ku nggatə tuwarna ka namtə ra ola.

³⁶Ga ku tsarəmta ali vəi tə kəi vəi səli ata, ka rwatə ra har tə səli aɗi suridzi wa.

³⁷I ku kədlə dawayeri arna ka nggyari ɗa, I aɗi thləthlatə wa, tar tə I kurəmta ɗa.

³⁸I ku ntsəvəmta ɗa har tə da amzhi thlatə wa, ka dlidlirəmta ɗa akira səli.

³⁹Ga an ku hamta ali duna kamnyar mpa ka dunar nggyari dawayeri arna.

⁴⁰Ga ku vu tə dawayeri arna ku shinar bwahila ɗa ka təra, ka ni dunar kurəmta shanga mji na nggəlar nci.

⁴¹Da ku tuwa dlara, amma mda aɗi na si ka mbantə ɗa wa, da ku hamta tuwar ɗa aka MTHLAKU, amma tsa aɗi shinau ala ɗa wa.

⁴²I ku hadləmta ɗa apa bərbər tə shambar ana fimta, ka ntsəntsartə ɗa apa maɓər kuta laku.

⁴³Ga ku msərantə ra ta mji na ana kampiku ka iya, ka vəi ra ola ata kəra tsəɗiyayeri, mji tə hwatu I aɗi səndə ɗa wa, kulini da ku ndzi akiri.

⁴⁴Təkəma tə da nggatə su ata kəri da ku kələngkər ali, ka si ka zuzuri akəmi.

⁴⁵Dza ɗa ku mti antə da ku hwi səɓəla akwa vəi tə da ɗuwardzi ni ka yakata.

⁴⁶Jiri, MTHLAKU an Hyel na ka mpika! Mbura hu ni ali! Haptə gir thləma Hyel na ana mbantə ra

⁴⁷Tsa an Hyel na ana ntə dawa ata kəra mji na dəkəi ra, tsa andər nggyari dawayeri arna ali,

⁴⁸ka msərantə ra akwa tsiya ɗa. Tsa ana haptə ra ata kəra dawayeri arna, ka ɓəlatə ra ta sojayeri.

⁴⁹Kamnyar ngəni I ata hu nga MTHLAKU, akwa nca mji, kəi fwaltə thləma ga akwa hayeri.

⁵⁰Ga ana hamta nggyari su na ola aka kuthli tə ga an carɓəla, ka ncantə hirkur na ana palidzi wa aka mdə natə ga an vətə ni ata olkur, ga ku hara aka Dauda ka aka kəkayeri arni shang.