Read bura-pabir Zabura 19 Bible Online

Zabura 19 - bura-pabir bible

Zabura 19

¹Ha ar Dauda aka mdər pwar ha. Vəi na amtazi akwa ngkərɓəla olkur səliyir Hyel, tsa akwa ncantə masəkukur tsiyari ata bəbal.

²Kəlara vir na kura ana ngkər olkur səliyir Hyel aka vir na ata nuwari, tsuwa kəlara viri na ku hara ana jikatə labar ni aka viri na ata nuwari.

³Da aɗi ana gari ka mnya ɗa wa, antə mda aɗi ana nggatə kuraka ɗa wa.

⁴Wala apani gariyir ɗa ku dlarhə duniya, antə mji akwa nggatari ba akwa datər duniya. Hyel ku latə səva aka pci akwa vəi na amtazi.

⁵Antə pci ni ana zhar səvarni ka dli səɓəla ka kucali apa sala mwala, ka apa mdər hwi na ɓəɓal na ana kucalər hwi ar akəlakəla.

⁶Pci ni ana thlata akwa datər bwa laga amtazi, ka təramta ata kutahyel ka mwari akwa datari na abwa damwa. Su aɗi na amzhi ɗuwardzi ta pcirni wa.

⁷Tsawur MTHLAKU an nghyinghyari ka jirkur, tsa ana dunautə mda. Shanga suayeri tə tsa thlipə ni an jiri, da ana namtə mdə na butu ka tsa ndzi ɗəɗu.

⁸Suayeri tə MTHLAKU akwa thlipari ni an kalkal, antə mji na ana nu surthlipə ni ana ndzi ka kucali, Tsawur MTHLAKU an nghyinghyari ka jirkur, da ana kəlar nca mda ka tsa səndə su na kalkal.

⁹Thlivər ɗəffa MTHLAKU an su na ɓɗaku, mda ata ləkəma ka thlivər ɗəffari har ba saka madi. Shanga tsawayeri tə MTHLAKU hamta an kalkal, parang saka da kalkal.

¹⁰Da ku təramta dinar ka ampani, har ma da ku təramta dinar na ɓɗak ta shang. Msərakurər ɗa ku təramta nənəmkur cirməma, har ma da ku təramta yimər cirməma na ana njinjəɓəladzi akwa kangkang!

¹¹Da ana tsaktə ra, I na buɗar nga, antə I ana wutə riɓa hang atar ɓəla tsawayeri ni.

¹²Mda aɗi na ana mzhi nggaɓəla vəi sha arni ka kərari wa, tifəmta ali bikayeri natə I hara akwa kuta tur sənda.

¹³Ngkatə ra, MTHLAKU, ta I ahara biku dzakdzakku. Ga aɗiya zhar ka biku ndzi ka duna ata kəri wa! Antə I ata ndzi kula biku, kəi msər ta hara kər ɓəɓalkur ala ga.

¹⁴MTHLAKU, ga andər mbuli ra ka mdər pəli ra, antə I akwa kiɗə nga ka gə dlu ndərayeri ka dzamərna.