Read bura-pabir Zabura 22 Bible Online

Zabura 22 - bura-pabir bible

Zabura 22

¹Ha ar Dauda aka mdər pwar ha, natə ka mdə hangkir kurakər “Kimar na Ɗəɗəpa.” Hyelərna, Hyelərna, kamnyar mə tə gə fwari ata kəri ri? Kamnyar mə tə ga akwa ndzi ciju ta dlar ra ri? Kamnyar mə tə gə psəngkər thləm aka tuwarna ri?

²Hyelərna, təpci I akwa tuwa ala ga, amma ga aɗi ana shinau ali wa. Aviri I akwa hara adduwa ala ga, amma shang hərkari aɗi wa.

³Wala apani ga an ɓɗakkarkara, mjir Israila ana fwal dəkəl kuthlikurər nga

⁴Kəkayeri ar yeru na waci ku mbərsa ka ga, da ku mbərsa ka ga, antə ga ku msərantə ɗa.

⁵Da ku tuwa ala ga abbər ka gə dlar ɗa antə ga ku mbantə ɗa. Da ku mbərsa ka ga, antə da aɗi ləkwa sur səli wa.

⁶Amma arna I ku ndzi apa kulamnya, I aɗi mdə wa. shanga mji akwa mnya ɗimi ali ka rutə ra.

⁷Shanga mji na ku wutə ra ana hara kyartəkur ali, da ana ɗanggur mnya ali ka kənggələmta kəra ɗa.

⁸Da ana yu mnyi abbər, “Gə pəla ga ana hamta shanga damitədzər nga aka MTHLAKU, to, ka MTHLAKU ni mbantə ngə bu! Ma MTHLAKU an hir ngə jiri, kamnyar mə tə tsa ambuli ngə wa ri?”

⁹Ga an vu tə I mzhi səɓəla akwa kuta mama'na lapiya, tsuwa ga an ɓəlatə ra sakatə I ata uwa.

¹⁰Təng sakatə mdə yaɓəla ra ga andər wulwul ra, təng tə mdə yaɓəla ra ga an Hyelərna.

¹¹Ga aɗiya ndzi ciju ta i'i wa! Kamnyar dawayeri na ana hara bwani ali ni ku hara kudzəha, tsuwa mdə damwa aɗi na adlar ra wa.

¹²Dawayeri dlama dlama ku kalaktə ra apa gyalayeri, da kalaktə ra apa gyalayeri na ka duna ar tsəɗi Bashan.

¹³Da ana kəlar mnya ɗa apa tsəngiyayeri, na akwa nggyinggya kamnyar ka da kukwahəmta ra.

¹⁴Duni ku kuri karkar, apatə yimi ana pumtadzi ata di ka shiwa. Shanga ɗethlər məngdli ku ɓəgəli, ɗəffi ku juwidzi apa ndivər.

¹⁵Duni ku ula apa hangndlya, tsuwa kyanggyari ku bartə kuta mnyi. Ga ku təra kazhar ra akwa bərbər, ka zhar ra apa mdə na ku mti.

¹⁶Dawayeri ku kalaktə ra apa bəri kilayeri, da tsaɓəngkərdzi ali ka hartə ra, ka huhukthləhə tsi kəga səli apa tsəngi.

¹⁷I ata mzhi jikatə shanga ɗethlər thlimbəli pal pal. Dawayeri ku ɗəməngkər ali ncar ruta.

¹⁸Da ku ndəkəi ləptayeri akwa daɓwa ɗa, ka ndzəh kuriya ata kəra ləptərna.

¹⁹MTHLAKU, ga aɗiya ndzi ciju ta i'i wa! Ga andər dlar ra, antə hangkər kara mbantə ra, usa!

²⁰Msərantə mpikəi ta mtər katsakar, msərantə mpikəi ta kila nayeri ni!

²¹Mbultsə ra akwa mnya tsəngiyayeri ni! Msərantə mpikəi ta təmbəla kufurayeri!

²²I ata psəmnya suayeri tə gə hara ni aka mjirna, kəi hu nga akwa tsaptədzər ɗa.

²³Hu gir ni, giri na ana thlivər ɗəffa MTHLAKU! Nar giri olkur, shanga giri na kəkar Yakub! Thlivər gir ni, shanga giri na mjir Israila!

²⁴Kamnyar tsa aɗi ana nggəlar mjir bwani wala rutə ɗa wa, tsa aɗi ana hamta kəmari kazhar bwaniyir ɗa wa. Amma tsa ana nggatə ɗa kəlara sakatə da ku tuwa dlara akəlari.

²⁵Kamnyar su tə gə hara an akwa vu ra kəi hu nga akwa nca mji hang, I ata nghyaɓəla alkawalərna akəma mji na ana thlivər nga.

²⁶Mjir bwani ata sə səm susəma ka ndli, antə shanga mji na ana vəngkər səli ala ga, MTHLAKU, ata sə hu nga! Ka Hyel na giri msərakur ba saka madi!

²⁷Shanga mjir duniya ata sə ɗangtə MTHLAKU ka hu ni. Da ata sə thlata akwa kəlara bwa akwa duniya ka ngka adzə ni, antə shanga durayeri ata sə vəngkər səli alari.

²⁸Kamnyar MTHLAKU an kuthli, tsa an ka kuthlikur ata kəra shanga mjir duniya.

²⁹Shanga mji na ka gəna, ka mji na ana gaya, ata sə si ka zuzuri akəma ga, MTHLAKU. Tsuwa shanga mji na kum ka mamshi, ata sə zuzuri akəma ga

³⁰Mjir zamanayeri na akəmazi ata sə vəngkər səli ala ga, MTHLAKU, da ata sə ngkər su ata kəra ga, aka zaman na akəma.

³¹Da ata pəla aka mji natə mda aɗi yaɓəla ɗa katagu wa abbər, “MTHLAKU an mbantə yeru!”