Read bura-pabir Zabura 23 Bible Online

Zabura 23 - bura-pabir bible

Zabura 23

¹Ha ar Dauda. MTHLAKU, ga andər ɓəla ra, I aɗi ata tur su wa.

²Ga ana hara kəi ghərəmtaghəra akwa vəi kusar na mirakəu. Ga ana pwar ra ka mwantə ra akwa yimi na cilangcilang na ana hwi ka hangkal.

³Ga ana na ali duna bilən. Ga ana vu ra akwa laku na kalkal, kamnyar səliyir thləma ga.

⁴Wala ma I an ata mwa akwa mular na ka kuthlu pələku, I aɗi ata thlivər su wa, kamnyar ga adzə ra. Zwal mwar nga ka zwal ɓəlar nga ata tsəlpi ra.

⁵Ga ana ɗəmha ali susəmər olkur ata nca dawayeri arna, ga ana dlu ra apa mətəpi na ola atar kəkərtə kəri ka mal, ka nghyantə ali kwapərna caɓcaɓu ka sur sa na msəra.

⁶Jiri, ɓɗakkur ka hirkurər nga ata ndzi adzə ra tədəku akwa shanga ndzəndziyirna. Tsuwa I ata ndzəndzi akwa mbwar ngə, MTHLAKU har ba saka madi.