Read bura-pabir Zabura 25 Bible Online

Zabura 25 - bura-pabir bible

Zabura 25

¹Ha ar Dauda. Ala ga, MTHLAKU, antə I akwa hara adduwa ni.

²Hyelərna, I ku mbərsa ka ga, ga aɗiya zhar kəi ləkwa sur səli wa, wala zhar ka dawayeri arna kumshi asar na wutə ra wa.

³Ga aɗiya zhar ka mji na mbərsa ka gə ləkwa sur səli wa, amma kara kəli səliyir mji na ana ɓəli mdə kula suari aɗi.

⁴Thlipa ali lakur ngə, MTHLAKU, ncaɓəla ali laku tə kalkal kəi nuwa.

⁵Thlipa ali laku tə I ata ndzi ka jili jirkurər ngə ni, kamnyar ga an Hyel na ana mbantə ra. I ana ɓukci akwa vəkər ka ga.

⁶Ɗangtə hirkurər nga na ana palidzi wa ni ni, ka kətadzər ngə ni, MTHLAKU, natə gə ncanta aka mji təng waci ni.

⁷Ka gə tifəmta ali bikayeri natə I hara akwa ngkyarkur, kamnyar tə gə hir shanga mjir ngə ka duna. Kamnyar tə ga ana hara ɓɗakkur ala ɗa, ka gə ɗangtə ra bu, MTHLAKU!

⁸Kamnyar MTHLAKU an ɓɗaku, tsuwa tsa ana hara su kalkal, tsa ana ncantə laku na kalkal aka mji na ku sha.

⁹Tsa ana pwar mji na ka kanaɗikur ka da hara su na kalkal, ka thlipa ala ɗa lakurni.

¹⁰MTHLAKU ana ncantə hirkur na ana palidzi wa ka jirkur akwa shanga surni aka mji na ana kəsi alkawal ka kələngkər alari.

¹¹Kamnyar səliyir thləma ga, MTHLAKU, ka gə tifəmta ali bikərna kamnyar bikərna ku hara ola kamta.

¹²Mji na ana thlivər ɗəffa MTHLAKU, MTHLAKU ata thlipta ala ɗa su na kalkal ka da hara.

¹³MTHLAKU ata ləkəma ka hamta ala ɗa su ɓɗakɓɗaku, tsuwa kəkayeri arɗa ata ləkəma ka ndzi mthlakər tsəɗi ni.

¹⁴MTHLAKU an pazhir mji na ana kələngkər alari, tsuwa tsa ata thlipa ala ɗa su tə mda akwa bara ka da hara akwa alkawal ni.

¹⁵I ana putə nci ata MTHLAKU tədəku, antə parang tsa ana msərantə ra akwa su na mwavər.

¹⁶Shinardzi təbwar na MTHLAKU, kara kətadzə ra, kamnyar I aɗi ka mdər dlar wa, tsuwa I akwa ɗar bwani.

¹⁷Damitədzayeri arna akwa jakjaka fyarar ra akwa bwaniyayeri arna shang.

¹⁸Wul jili bwani ka damitədzi tə I akwa ni, kara tifəmta ali shanga bikayeri arna.

¹⁹Wul jili hangkur dawayeri tə I kəgari, ka ɗimikur laku tə da nggəlar ra akwa!

²⁰MTHLAKU, ka gə ɓəlatə ra, ka mbuli ra, ga aɗiya zhar ka sur səli wutə ra wa, kamnyar ga an vəi ɗuwardzərna ta asar.

²¹Ndzi ka ɓɗakkurərna ka jirkurərna ɓəlatə ra, kamnyar I ana vəkər ka ga, MTHLAKU.

²²Hyel, ka gə pəli mjir nga Israila, akwa shanga bwaniyayeri tə da akwa ɗarari.