Read bura-pabir Zabura 26 Bible Online

Zabura 26 - bura-pabir bible

Zabura 26

¹Ha ar Dauda. Ncanta aka mji, MTHLAKU, abbər I kula biku, Kamnyar I ana hara su akwa kuta jirkur, tsuwa I ana mbərsa ka ga, MTHLAKU ka ɗəffi shang.

²Ngkərtə ra, MTHLAKU, ka gə nggaɓəla ra, ngkərtə su na akwa ɗəffi ka su na akwa kəri.

³Kamnyar I səndə parang abbər gə hir ra ka jirkur, tsuwa ga ana pwar ra ka jirkur.

⁴I aɗi ana paktə kər ka mjir thlandər wa, wala mwa kəga mji na shimnya wa.

⁵I aɗi ana hir mwardzi ka mjir hara ɗimikur wa, wala ndzi ata vəi duku ka kəmanggarayeri wa.

⁶I ana kəcimta tsi, MTHLAKU, kamnyar kəi ncanta abbər I aɗi ka biku wa, kəi mwa ka kalaktə bagaɗi ar nga.

⁷I ata hara ha ar usar nga ka kuraku, ka pəlaɓəla shanga surndatayeri tə gə hara.

⁸I ana hir vəi tə ga ana ndzəndzi akwa MTHLAKU, vəi tə mda ana wutə olkur səli ar nga.

⁹Ga aɗiya shamta ra ata kəma duku kəga mjir biku wa, wala dlu mpikəi ata kəma duku kəga mjir tsi mdə wa.

¹⁰mji natə kəthlərər ɗa an ɗəmhə ɗimikur, natə parang da akwa dlu sur dzəɓ mnya.

¹¹Amma arna, I ana hara su na kalkal, antə usa, kətadzə ra kara mbantə ra!

¹²Kulini I ku thləthlatə gyang! Tsuwa ma sakatə mjir nga ku tsaptədzi I ata hu ngə, MTHLAKU.