Read bura-pabir Zabura 27 Bible Online

Zabura 27 - bura-pabir bible

Zabura 27

¹Ha ar Dauda. MTHLAKU an parakərna ka mdər mbantə ra, antə mda aɗi tə I ata thlivərari wa! MTHLAKU andər ngkamta ali shanga asarayeri, antə su aɗi tə I ata thlivərari wa.

²Ma sakatə mji na ɗimi ku daɓəngkərdzi ali, sakatə dawayeri arna ku lətə kəri ka mpa ka da tsi ra, da ata tsamta səla ɗa ka ndla.

³Wala ma sojayeri dlama dlama ku kalaktə ra, I aɗi ata thlivər wa. Wala ma dawayeri ata pwa ata kəri ka mpa, ba kulini I ata mbərsa ka ga.

⁴Su pal antə I kiɗa akəla MTHLAKU, su duku daci antə I akwa barari, kəi ndzi akwa mbwar MTHLAKU akwa shanga ndzəndziyirna, kəi wul ɓɗakkur surndatayeri tə tsa hara ka kiɗə ni ka tsa pwar ra akwa shanga su.

⁵Kamnyar tsa ata sə ɗuwar ra ma I ku ləkwa bwani, ka tsəlpi ra lapiya akwa vəi ndzəndziyirni, ka ɗuwamta ra ata kəra gar na nal.

⁶Apani ga ata ni dunar nggyari dawayeri arna na kalaktə ra. Antə I ata hamta saɗaka ka kurakər kucali akwa mbwar vəngkər səli alari, I ata hara ha ka kuraku na msəra aka MTHLAKU.

⁷Psi thləma ga ali bu, MTHLAKU, kəlara sakatə I ku hara adduwa ala ga! Kətadzə ra, ka ra shinau ali!

⁸Ga ku gari ali akwa ɗəffi abbər, “Sər kara nu ra.” Antə I shinau abbər, “I akwa si, kəi nu ngə, MTHLAKU.

⁹Ga aɗiya ɗuwar kər nga ali wa!” Ga aɗiya kədləmta ra kamnyar ɗəffa gə na ɓzə wa, kamnyar gə duku hwatu andər dlar ra. Ga aɗiya təra kazhar ra wa, wala fwari ata kəri wa, kamnyar, ai Hyel, ga andər mbantə ra.

¹⁰Wala ma baba'na ka mama'na ku fwari ata kəri, MTHLAKU ata wulwul ra.

¹¹MTHLAKU, thlipa ali su tə ga ata bara kəi hara, ka gə pwar ra akwa laku na ɓɗakari, kamnyar I ka dawayeri na akwa kiɗa abbər kəi ndla.

¹²Ga aɗiya zhar ra aka dawayeri arna wa, kamnyar da akwa thlandər ata kəri, ka thlivərantə ra abbər da ata dlaɓu ra

¹³Ba kulini I ka hamta jiri abbər, MTHLAKU ata sə hara ali ɓɗakkur akwa duniya ngəni.

¹⁴Mbwi ɗəffa ga ka gə mbərsa ka MTHLAKU, mbwidzi salsal, ga aɗiya thlivər su wa, Jiri, ar nga mbərsa bu ka MTHLAKU!