Read bura-pabir Zabura 29 Bible Online

Zabura 29 - bura-pabir bible

Zabura 29

¹Ha ar Dauda. Hu gir MTHLAKU, giri na amtazi, haptə giri thləmari kamnyar duna ka səli tə tsa kəgari.

²Nar giri olkur aka MTHLAKU kamnyar səliyir thləmari, zuzuri gir akəma MTHLAKU kamnyar olkur səliyirni.

³Mda akwa nggatə mandayeri akwa dlu kuraka MTHLAKU Hyel na ka səli akwa dləra, antə manda na ola akwa dlu kurakari.

⁴Kuraka MTHLAKU ni ka duna kuraka MTHLAKU ni nghyinghyari ka daraja.

⁵Kuraka MTHLAKU ana ɓəgələmta nfwayeri ar seda, wala nfwayeri ar seda na ahar Lebanon.

⁶Tsa ana hara ka gar Lebanon fəgəlta apa kənayeri, ka gar Harmon fəgəlta apa gyal na ka sakarni.

⁷Kuraka MTHLAKU ana vu ka wurkə səɓəla apa kyanggyara u'u.

⁸Kuraka MTHLAKU ana kənggərantə kuta mtakəu, MTHLAKU ana kənggərantə kuta mtakər Kadesh.

⁹Kuraka MTHLAKU ana vu ka kwi ya kula sakari, ka thlarəmta thlali nfwayeri na akwa mtakə ngyatu. Tsuwa mji ana haptə kuraku akwa mbwar vəngkər səli alari, ka pəla, “Ka səli na ola ndzi aka MTHLAKU.”

¹⁰MTHLAKU an ka duna ata kəra pərtu, tsa an kuthli na ata hara kuthlikur har ba saka madi.

¹¹Ka MTHLAKU dunautə mjirni! Ka tsa vədza ala ɗa barka, ka na ɗa ndzəndzi lapiyakur!