Read bura-pabir Zabura 31 Bible Online

Zabura 31 - bura-pabir bible

Zabura 31

¹Ha ar Dauda aka mdər pwar ha. I akwa bara vəi ɗuwardzi adzə ngə, MTHLAKU, antə ga aɗiya zhar kəi ləkwa səli wa. Ga ana hara sur nga kalkal, antə kara mbantə ra usa.

²Nggatə adduwarna, ka gə mbantə ra taktar! Ka gə ndzi pela ar ɗuwardzərna, katangga na ka dunar mbuli ra.

³Jiri, ga an pelar ɗuwardzərna, ka kəi na ɓəɓal ar ɗuwardzərna. Pwar ra kamnyar səliyir thləma ga, ka gə ɓəlatə ra.

⁴Kəɓəla ra kazhar dərku tə dawayeri arna nggəi ali ni, kamnyar ga an vəi ɗuwardzərna.

⁵Akwa tsiya ga antə I akwa hamta mpikəi. Ga ku mbantə ra, MTHLAKU, kamnyar ga an Hyel na ka jirkur.

⁶Ga ana nggəlar mji na ana vəngkər səli aka haptayeri, amma arna I ana mbərsa ka ga, MTHLAKU.

⁷Ɗəffi msəra ali antə I ata hara kucali kamnyar hirkurər nga na ana palidzə wa ni. Ga ku wutə bwani tə I akwa tsuwa ga səndə su na akwa damitə ra akwa ɗəffi.

⁸Ga aɗiya zhar ka dawayeri arna ngkəi ra wa, ga ku zhar ra kəi mwari akwa vəi tə I hira.

⁹Kətadzə ra, MTHLAKU, kamnyar I akwa bwani. Nci ku ghəri akwa tuwa, dzi shang ku ghəri kupthləhu.

¹⁰I kuri shanga ndzəndziyirna akwa ɗəffə ɓzəɓza, hangkur məvəi ku kəmtadzi kamnyar tuwa. Bwani ku samnya duni shang, antə ɗethlayeri arna shang ku ndzi kukuhtər kula duna.

¹¹I ku ndzi sur kyartəkur aka shanga dawayeri arna, na ɗimiyari ni ma aka ntəwulayeri arna. Wala pazhayeri arna ana thlivər si adzə ra, ma da ku wutə ra akwa laku da ata hwi.

¹²Mji ku fwari ata kəri apa I ku mti, I ku ndzi apa tughum na jaɓjaɓwari.

¹³Jiri, I ana nggatə dawayeri arna akwa cicuh su na ɗimi ata kəri! Kəlara bwa tə I nuwa I ata thlivər ɗa. Kamnyar da akwa ɗəmhə ɗimikur ata kəri, abbər ka da sə kəl mpikəi.

¹⁴Amma arna, I ana mbərsa ka ga, MTHLAKU, ga an Hyelərna.

¹⁵Mpikəi akwa tsiya ga, msərantə ra akwa tsiya dawayeri arna, akwa tsiya mji na akwa hara bwani ali ni.

¹⁶Wul buɗar nga ka ncar kətadza, kara mbantə ra kamnyar hirkurər nga na ana palidzi wa ni ni.

¹⁷MTHLAKU, ga aɗiya zhari kəi ləkwa səli wa, kamnyar I ana hara adduwa abbər kara dlar ra. Zhar ka mji ɗimi ləkwa səli, ka da kurəmtadzi ka ləkwa kula kula mji nggata.

¹⁸Hartə mnya mjir thlandəra, kamnyar da ana mnya ɗimi aka mji na pwa, ka gari ala ɗa ka gaya ka ruta.

¹⁹Ga ana hara ɓɗakkur ka duna! Ga ku ɗəmhə suayeri na ɓɗakɓɗaku hang aka mji na ana thlivər nga! Shanga mji asənda abbər ga ku ɗəmhə ɓɗakkur aka mji na ana ɗuwardzi adzə nga.

²⁰Ga ana ɗuwar ɗa ɓɗaku adzə nga, ta ɗimikur tə mji ɗəmha. Ga ana ɗuwar ɗa ɓɗaku kula su wutə ɗa, ta da nggatə nggənggəla akəla dawayeri arɗa,

²¹I ata fwal ngə, MTHLAKU, kamnyar ga ku ncanta ali hirkur na ola, sakatə dawayeri kalaktə ra apatə mji ana kalaktə bərni ka mpa

²²I ku thlivəri ka dzama akwa ɗəffi, abbər tsa ku kədləmta ra kazhar kəmari. Amma tsa ku nggatə tuwarna ka dlar ra, sakatə I səntə kiɗayeri arna akəmari.

²³Ka giri hir MTHLAKU, shanga giri na mjirni! MTHLAKU ana ɓəlatə mji na ka jirkur, amma tsa ana ɗi mjir gaya.

²⁴Ka giri ndzi ɓəɓal ka ndzi katsala, shanga giri na ana vəkər ka MTHLAKU!