Read bura-pabir Zabura 32 Bible Online

Zabura 32 - bura-pabir bible

Zabura 32

¹Ha ar Dauda kamnyar thlipə ɗəɗukur aka mda. Mji natə mdə ku tifəmta ala ɗa bikər ɗa ana ndzi ka kucali, mji tə mdə ku hartə vəi ɗimikura ɗa.

²Msəra aka mji tə MTHLAKU aɗi ana jikau ɗa akwa nca mjir biku wa, ka mji tə halər pwaktə mda aɗi akwa dza ɗa wa.

³Kəlara sakatə I nggəlar ta pəlaɓəla bikərna, dzi ana kəmtadzi, kamnyar ɓukci akwa tuwa har ka pci təri.

⁴Kamnyar pci ka viri ga akwa ɗi ra, duni ku kuri karkar apatə yimi ana shiwa ata pcir fakəu na ghaɗaku

⁵Apani antə I ku pəlaɓəla bikayeri arna ala ga, I aɗi ɗuwar ala gə kuti wa. I kwamta abbər kuji kəi jikaɓəla ɗa ala ga, antə ga ku tifəmta ali bikayeri arna.

⁶Antə ka shanga mjir nga hara adduwa ala ga kəlara sakatə da ku wutə kərɗa akwa bwani, wala ma bwaniyayeri ni an si apa avava kamnyar hartə ɗa, asarari aɗi ata mzhitə ɗa wa.

⁷Ga an vəi ɗuwardzərna, ga ata ɓəlatə ra ta bwani, Ga ana kalaktə ra ka kuraka mji na akwa kucalər mbantədzər na.

⁸Hyel akwa pəla, “I ata thlipa ala ga, ka ngkərɓəla ala ga laku tə ka gə hara su akwa, I ata hamta ala gə sauri, kəi wulwul kəra ga.

⁹Ga aɗiya ndzi kula kər apa taku wala kwaraləbandər wa, natə tar ka mdə ngkahə ɗa ka nggaɓəram ka lanjam, kambəla da hara su tə mda akwa barari.”

¹⁰Bwaniyayeri zumzum hang ana si ata kəra mji na kəmanggar, amma mji na ana mbərsa ka MTHLAKU tsa ana kalaktə ɗa ka hirkur na ana palidzə wa.

¹¹Antə giri na ana hara su kalkal, ka giri hara kucali kamnyar su tə MTHLAKU hara, ka shanga giri na ka ɗəffu mwapu, hara ha ar kucali ka kuraku.