Read bura-pabir Zabura 33 Bible Online

Zabura 33 - bura-pabir bible

Zabura 33

¹Giri na ana hara su kalkal, ka giri hara kucali ka kuraku kamnyar su tə MTHLAKU hara, kalkal ka giri hu ni, giri na ka jirkur ni.

²Fwal gir MTHLAKU ka yakandi, hara gir alari ha na msəra ka surtsa na ka suwari kuma!

³Hara gir ha bilən alari, tsa giri guləm ka masəkukur ka giri hara kucali ka kuraku.

⁴Kamnyar su tə MTHLAKU pəla ni jiri, tsuwa tsa ana hara shanga surni ka jirkur.

⁵MTHLAKU hir su na kalkal ka na ka jirkur, tsa ku nghyantə duniya shang ka hirkurərni na ana palidzə wa.

⁶MTHLAKU ku gari antə vəi na amtazi ku alaktədzi, tsa ndəra təng pci, ka thliya, kəga sasəlkayeri namtədzi.

⁷Tsa tsaptə mandayeri na ol'ola ata vəi duku, ka hartə ɗa akwa vəi tsaptər ɗa na bau.

⁸Ka shanga mjir duniya ni thlivər MTHLAKU! Nar giri olkur, shanga giri na akwa duniya ni!

⁹Kamnyar sakatə tsa ndəra, təng duniya həntədzi, tsa hamta tsawa, antə shanga su ku wutədzi.

¹⁰MTHLAKU ana huzamta suayeri tə tsəɗiyayeri na asəndə Hyel wa ku ɗəmha, ka ngkata ala ɗa haratə su tə da ɗəmhə ni.

¹¹Amma su tə MTHLAKU ɗəmha ana ndzi har ba saka madi, su tə tsa dzamta akwa ɗəffari ana ndzi har ba saka madi.

¹²Msəra aka tsəɗi natə Hyelərni an MTHLAKU, mji tə tsa carɓəla ɗa ka da ndzi mjirni.

¹³MTHLAKU na amtazi ana haghəi ncari akwa duniya, ka wutə shanga mjir duniya.

¹⁴Tsa ana ndzəndzi ata dəkəl kuthlikurərni, ka wul su tə shanga mjir duniya akwa harari.

¹⁵Tsa an namtə ɗəffa ɗa shang, antə tsa səndə shanga su tə da ana hara.

¹⁶Kuthli aɗi ana səm mpa kamnyar dunar sojayeri arni wa, soja aɗi ana səm kamnyar ɓəɓalkurərni wa.

¹⁷Ga aɗiya vəkər ka takur mpa abbər tsa ata vu kara səm wa, kamnyar olkur dunari ni amzhi mbantə ngə wa.

¹⁸MTHLAKU ana wulwul mji na ana thlivər ni, mji na ana vəkər ka hirkurərni na aɗi ana palidzə wa ni.

¹⁹Tsa ana ɓəlatə mpika ɗa ta mta, ka tsəlpi mpika ɗa wala akwa sakar mi.

²⁰Yeru akwa vəkər ka ga, MTHLAKU, kamnyar ga andər dlar yeru ka mdər tsəlpi yeru.

²¹Jiri, ga akwa namtə ɗəffa yeru msəra ala yeru, kamnyar yeru ku mbərsa ka ga, abbər ga an Hyel duku.

²²MTHLAKU, zhar ka hirkurər nga na ana palidzi wa ni ndzi adzə yeru, kamnyar yeru ana vəkər ka ga.