Read bura-pabir Zabura 34 Bible Online

Zabura 34 - bura-pabir bible

Zabura 34

¹Ha ar Dauda sakatə tsa namtə kərni apa tsa ka cicu akəma Abimelek, antə Abimelek ku kədləmta ni. I ata usar MTHLAKU tədəku, I ata ləkəma ka hu ni tədəku.

²I ata fwal MTHLAKU kamnyar su tə tsa hara, antə ka shanga mjir bwani psi thləm ka da hara kucali.

³Ndzi ka mburu nar olkur aka MTHLAKU, ka shanga mburu haptə thləmari ata kəma duku!

⁴I ku hara adduwa abbər ka MTHLAKU dlar ra, antə tsa ku dlar ra, ka msərantə ra akwa shanga suayeri tə I akwa thlivərari.

⁵Mji na ana putə nca ɗa ata MTHLAKU kamnyar dlara, ana ndzi ka kucali da aɗi ana ləkwa səli wa.

⁶I ku tuwa aka MTHLAKU abbər ka tsa dlar ra kamnyar bwani tə I akwa, antə tsa ku nggatə ra ka msərantə ra ta shanga bwaniyayeri arna.

⁷Kamnyar mdərthlentərhyel arni ana wulwul kəra mji na ana thlivər ɗəffari, antə tsa ana ngkamta ala ɗa asar.

⁸Ngkərtə MTHLAKU, antə giri ata nggaɓəla laku tə tsa hir mda akwa. Arɗa msəra ala ɗa, da na ana ɗuwardzi adzə ni!

⁹Ka giri nar səli aka MTHLAKU, shanga giri na mjirni, kamnyar mji na ana thlivər ɗəffari aɗi ana tur su wa!

¹⁰Wala maɗa' tsəngi na ka duna ma da ana tur susəma ka məi kətə ɗa. Amma mji na ana mbərsa ka MTHLAKU aɗi ana ni ka su na ɓɗaku wa.

¹¹Sər giri, maɗangkyar, ka giri psi thləm ali, antə I ata thlipa ala giri lakur nar səli aka MTHLAKU.

¹²Wan an ata bara nggatə msərakur ndzəndziyir nə ri? Wan ata bara fa na saɓəl ka tsa nggatə msərakur ri?

¹³To tar kara zhar mnya ɗimi ata kəra mda, ka gə zhar pwaktə mda.

¹⁴Zhar hara ɗimikur, kara hara su na ɓɗaku, bara su na ata səntə lapiyakur ka ɗəffa gə shang.

¹⁵MTHLAKU ana wul kəra mji na pwa, tsuwa tsa ana psi thləm aka tuwar ɗa

¹⁶MTHLAKU aɗi ana hir mjir hara ɗimikur wa, antə tsa ata shamta ɗa karkar ata kəra duniya ka mdə fwari ata kəra ɗa.

¹⁷Kəlara sakatə mji na pwa ku tuwa dlara akəla MTHLAKU, tsa ana nggatə ɗa, ka fwaɓəla ɗa akwa shanga bwaniyayeri tə da akwa.

¹⁸MTHLAKU ana psi thləm aka mji na ka ɗəffə ɓzəɓza, ka mbantə mji natə dza ɗa ku mti.

¹⁹Su ɗimi ɗimi hang ana wutə mji na pwa, amma MTHLAKU ana msərantə ɗa akwa shanga ɗa.

²⁰MTHLAKU ana ɓəlatə ɗa akwa shanga dəkəidzi, tə wala ɗethla ɗa duku aɗi na ata ɓəl wa.

²¹Ɗimikur ar mji na ɗimi ana jaktə ngka ata kəra ɗa, ka kurəmta ɗa, tsuwa mda ana ɗi mji na ku nggəlar mji na pwa.

²²MTHLAKU ata sə mbantə mjirni tsa ata yafitə shanga mji na ku mbərsa ka tsa.