Read bura-pabir Zabura 35 Bible Online

Zabura 35 - bura-pabir bible

Zabura 35

¹Ha ar Dauda. Nggəlar ndərər mji na ana nggəlar ndərərna, MTHLAKU, ka gə mpa mji na ana mpa ka iya!

²Hatə kari mpar ar nga kara kətə partauwur nga ka gə sə mbuli ra,

³Haptə mwasər nga ka galiyir nga kara ngkamta ali mji na akwa kədlə ra! I ata bara kəi nggatə nga akwa pəla ali abbər, “I andər mbantə nga!”

⁴Vu ka mji na akwa bara kəl mpikəi ni, ləkwa səli ka mdə rutəmta ɗa! Ndəndatə hangkala mji na akwa ɗəmhə ɗimikur ata kəri ni, ka da shinar kəma ɗa ka hwi!

⁵Fimta ɗa apatə kəwal ana fimta kusar ka gə thlentə mdərthlentərhyel ar nga ka tsa kədləmta ɗa.

⁶Hara ka da mwa akwa kuthlu akwa vəi na ka dlyadlirka ka mdərthlentərhyel ar nga akwa kədlə ɗa.

⁷Kamnyar da ku ngga dərku ali kula suari aɗi, ka lamta ku zurang abbər kəi tərkwa ka da ngkəi ra.

⁸Səntə asar ata kəra ɗa kula səndər ɗa, ka gə vu ka dərku tə da ngga ali ni jaktə ndlangkərdzi ala ɗa, ka da ndla ka kurəmtadzi həcipu!

⁹Antə I ata hara kucali kamnyar su tə MTHLAKU hara, I ata hara kucali kamnyar tsa ku mbantə ra.

¹⁰I ata hu ni ka kuti duku abbər, “MTHLAKU, mda aɗi tə mda agira ka gə wa. Ga ana mbuli mji na hava akwa tsiya mjir duna, ka mbuli mji na ngguɗi akəla mjir na ɗa bwani.”

¹¹Mji na ɗimi ana thlandər ata kəri, ka kathləmi akwa suayeri na ɗimi ɗimi tə I aɗi səndə su ata kər wa.

¹²Da ana nta ali ɓɗakkur ka ɗimikur, ka zhar ra ka ɗəffə ɓzəɓza.

¹³Amma ma sakatə da nggawa I ana ndzi fahəfahari ka vətə səlkum. I ana nggəlar səm susəma, akwa kiɗə Hyel ala ɗa ka kuti duku, wala tə Hyel aɗi ana dlu adduwarna kamnyar ɗa wa.

¹⁴Nggawakur arɗa ana damitə ra ka duna apa da pazhirna wala ɓzərmana, I ana mwa ka tuwa apa mdər tuwa mama'ni, ka kəri haghəihaghəyari kamnyar ɗəffə ɓzəɓza.

¹⁵Amma arna ma I tsamta səli ɗəffa ɗa ana ndzi msəra ala ɗa, har ka da tsaɓəngkərdzi ali ka kumshi ra. Mji na aɓdala tə I aɗi səndə wa ana hara kyartəkur ali ka abdalakur, ka mnya ɗimi ata kəri kula thləthlata.

¹⁶Da mnya ɗimi na ɗimi kamta apa mji na aɗi səndə Hyel wa, da akwa kumshi ra ka fa thlira ɗa ali.

¹⁷Nawa ri MTHLAKU, tə ga ata sə zhar wul ra ka nca daci ni? Msərantə ra ta mjir bara mpa ra, kara mbantə mpikəi ta tsəngiyayeri ni!

¹⁸Antə I ata usar nga akəma mjir nga na ku tsaptədzi, kəi hu nga akəma ɗa shang.

¹⁹Ga aɗiya zhari ka da hara kucali ata kəri wa, mji na ndzi dawarna kula suari aɗi ni. Ga aɗiya zhari ka mji na nggəlar ra kula suari aɗi ni ɓəl nca ɗa ar ɗimikur ata kəri wa.

²⁰Kamnyar da aɗi ana gari lapiyakur wa, tar ɗəmhə thlandərayeri ata kəra mjir bara ndzəndziyir lapiyakur.

²¹Da ana kələmta mnya ɗa bau akwa nggəl ra abbər, “Yauwa, gan hara su ni! Yeru ku wutə nga ka nca yeru!”

²²Ga ku wutə su ngəni shang, MTHLAKU. Antə usa, ga aɗiya dləɓa ata kər wa, wala ndzi ciju ka vəi tə I ata wa!

²³Mwa usa, kara mbul kəri! Mwa kara mbul ra, kamnyar ga an Hyelərna, MTHLAKU.

²⁴Ncanta abbər I kula biku, MTHLAKU, kamnyar ar nga gə kalkal, ga aɗiya zhar ka dawayeri arna kucali ata kəri wa!

²⁵Ga aɗiya zhari ka da pəla akwa ɗəffa ɗa abbər, “Yauwa, mburu ku nggyari ni! Shang an su tə mburu akwa barari” wa.

²⁶Ndəndatə shanga mji na ana kucali kəlara saka tə I ku ləkwa bwani, ka gə pu ɗa akwa sur səli. Kəli səliyir shanga mji na ana namtə kərɗa apa da təramta ra ni, ka mdə rutə ɗa.

²⁷Amma ka gə hara ka mji na akwa bara wuta abbər I kula biku ni, hara kucali ka kuraku tədəku. Hara ka da pəla abbər, “Kaai, amma MTHLAKU ni ol jiri! Tsa ana nggatə msərakur ma shanga su akwa mwa kalkal aka mdər kəthlər alari”

²⁸Apani I ata ɓukci akwa fwal nga ka kuraku, kamnyar ga ana hara shanga su kalkal.