Read bura-pabir Zabura 37 Bible Online

Zabura 37 - bura-pabir bible

Zabura 37

¹Ha ar Dauda. Ga aɗiya damitədzi ata kəra mji na ɗimi wa, tsuwa ga aɗiya səlkər mjir hara ɗimikur wa.

²Kamnyar aɗi ata fəi wa da ata sha apatə kusar mirakəu ana tətəɓwa, ka da mtəgəmtadzi apatə kusar ana uləmtadzi.

³Mbərsa ka MTHLAKU, ka gə hara ɓɗakkur, antə ga ata səm fa akwa tsəɗi ni ka nggatə msərakur.

⁴Hara su na ata kəskəra MTHLAKU, antə tsa ata hamta ala gə mwaɓər ɗəffa ga.

⁵Zhar shanga su akwa tsiya MTHLAKU. Mbərsa ka tsa antə tsa ata dlar nga.

⁶Tsa ata ncaɓəlari ata bəbal abbər gə kula biku, ka ncanta abbər su tə gə hara ni kalkal.

⁷Mbwi ɗəffa ga, kara sək su tə MTHLAKU ata harari, ga aɗiya damitədzi ata kəra mji na akwa ləkəma wa, wala damitədzi ata kəra mji na ana səma akwa laku na ɗimi wa.

⁸Zhar kəl ɗəffu wala ndzi ka ɗəffə bwarbwarkur, kamnyar ɗəffə ɓzəɓza ata vu nga akwa hara su na ɗimi.

⁹Kamnyar mda ata sə kədləmta mji na kəmanggar, amma mji na ana mbərsa ka MTHLAKU ata sə ndzi mthlakər tsəɗi.

¹⁰Aɗi ata fəi wa, mji na ɗimi ata kura ata kəra duniya, wala ga an pakə ɗa akwa vəi ndzəndziyir ɗa, ga aɗi ata wutə ɗa wa.

¹¹Amma mji na ka kanaɗi ata sə ndzi mthlakər tsəɗi, ka ndzi lapiya akwa msərakur.

¹²Mji na kəmanggar ana ɗəmhə ɗimikur ata kəra mji na pwa, ka fa thlira ɗa ala ɗa.

¹³Amma MTHLAKU ana kumshi mji na kəmanggar, kamnyar tsa asənda abbər aɗi ata fəi wa mda ata shamta ɗa.

¹⁴Mji na ɗimi ana ntsuɓəla katsakarər ɗa ka kətsə yimər laliyir ɗa, kamnyar ka da tsəgəi mjir bwani ka mjir tursu, ka kurəmta mji na pwa.

¹⁵Amma katsakarər ɗa ni an ata kurəmta ɗa sur ɗa, tsuwa laliyir ɗa ata ɓəgələmtadzi.

¹⁶Su na raka tə mdər Hyel kəgari, ku təramta shanga gənar mdə na kəmanggar.

¹⁷Kamnyar MTHLAKU ata ɓəli duna kəmanggar, amma tsa ata ɓəlatə mji na pwa.

¹⁸Tədəku MTHLAKU ana ɓəla mji na kula biku, antə tsəɗi ni ata ndzi arɗa ba saka madi.

¹⁹Da aɗi ata ɗar bwani wala akwa sakatə su ku hara mwavər wa, wala akwa sakar mi, da ata ndzi ka susəma hang.

²⁰Amma kəmanggarayeri ata kurəmtadzi. Mji na dawar MTHLAKU ata kura apatə pukdla ana kura akwa fakəu, ka sha apatə ɗer ana thlatə ka sha.

²¹Mji na kəmanggar ana dlu təpa ka zhar ntari, amma mji na pwa aɗi ana huni wa, da ana hamta su ka tsiya ɗa bwang

²²Shanga mji natə MTHLAKU ku vədzə barka ala ɗa da ata ndzi mthlakər tsəɗi ni. Amma mji tə tsa ku shuwumta ɗa mda ata kədləɓəla ɗa.

²³MTHLAKU ana pwar mji akwa laku natə kalkal ka da nuwa, ka ɓəlatə mji na ana hara su ka kəskərari.

²⁴Wala ma da an tsamta səla ɗa, da aɗi ata ndla wa, kamnyar MTHLAKU ana kəsi tsiya ɗa ka dlar ɗa.

²⁵Waci I ɓzərdakwi, antə kulini I ku hali, amma I aɗi ɗar wutə Hyel fwari ata kəra mji na pwa wa, wala wutə maɗa' ɗa akwa kiɗə susəm wa.

²⁶Parang da akwa hamta təpa ka tsiya ɗa bwang tsuwa maɗa' ɗa ana ndzi mji na pwa.

²⁷Zhar hara ɗimikur, ka gə hara ɓɗakkur, antə ga ata fəi akwa tsəɗi ni.

²⁸Kamnyar MTHLAKU ana hir su na kalkal, tsa aɗi ana nggəlar mjirni na ka jirkur wa. Tsa ata tsəlpi ɗa ba saka madi, amma tsa ata kədləmta maɗa' mji na kəmanggar.

²⁹Antə mji na pwa ata ndzi mthlakər tsəɗi ni, ka ndzəndzi akwa har ba saka madi.

³⁰Mji na pwa ana hamta sauri na ɓɗaku, kamnyar da ana pəla jirkur.

³¹Da ana kəsi tsawur Hyelər ɗa akwa ɗəffa ɗa, antə da aɗi ana pəra kazhar lakur ni wa.

³²Mji na kəmanggar ana nggwar mji na pwa abbər ka da kurəmta ɗa.

³³Amma MTHLAKU aɗi ata zhar ɗa ka dawar ɗa mula ala ɗa wa, wala zhar ka shariya ngkəi ɗa akəma alkali wa.

³⁴Ka gə vəkər ka MTHLAKU, kara nu tsawurni, antə tsa ata na gə olkur kara ndzi mthlakər tsəɗi ni, tsuwa ga ata wutə sakatə mda ata kədləmta mji na kəmanggar ni.

³⁵I ku ɗar wutə kəmanggar na kula kətadzə akwa mburəngkərdzi aka mji apa nfur bwala na akwa vəi na ɓɗaku.

³⁶Amma aghəla nda raka tə I ngka akwa təramta, I aɗi wutə ni kəra wa. I ku pakə ni, amma I aɗi wutə ni wa.

³⁷Wul mji na pwa na ka jirkur tsuwa, kamnyar nyarmbwar mjir bara ndzi lapiyakur ka mji, ana kuri ndzəndziyir ɗa akwa msərakur.

³⁸Amma mjir biku ana kurəmtadzi cipu tə wala mdə duku aɗi ana mbila akwa nyarmbwar ɗa wa.

³⁹MTHLAKU ana mbantə mji na pwa, ka ɓəlatə ɗa akwa sakar bwani.

⁴⁰MTHLAKU ana dlar mjirni, tsa ana msərantə ɗa akwa tsiya mji na kəmanggar, kamnyar da ana ra bara vəi ɗuwardzi adzə ni.