Read bura-pabir Zabura 38 Bible Online

Zabura 38 - bura-pabir bible

Zabura 38

¹Ha ar Dauda kamnyar ka Hyel ɗangtə mburu. MTHLAKU, ga aɗiya mpa ali sakatə ɗəffa ga ku ɓzi wa, wala ɗi ra sakatə ɗəffa ga ku mbu wa!

²Kamnyar afayeri ar nga ku ləkwa dzi, tsuwa ga ku tsamta ra ka tsiya ga har tə I təri ata di.

³Shanga dzi akwa kətə ra kamnyar ɗəffa ga na ɓza adzə ra. I ku ndzi nggawa kamnyar bikayeri tə I hara.

⁴Ɗimikurərna ku təramta kərathli, da ndzi apa kəla tə kəgəɓkurari ku təra duni.

⁵Kamnyar cakukurərna antə I ku hara biku, an su na hara tə mbəlkəi akwa hiɗa ka shiwur ni.

⁶I ku nggwamidzi ka duna kamnyar dzi na akwa kətə ra, I ɓukci akwa tuwa har tə pci təri.

⁷Kusari akwa kətə ra ka duna, tsuwa shanga dzi akwa damitə ra.

⁸I ku ghəri kupthləhu apa mda an dlaɓu ra, ɗəffi ku ɓzi, antə I akwa nggyinggya kamnyar bwani tə I akwa.

⁹MTHLAKU, ga asəndə su tə I akwa turari, tsuwa ga akwa ngga shanga tuwa tə I akwa harari.

¹⁰Kərathli akwa ɓathla ka duna, I aɗi ka duna wala raka kəra wa, tsuwa nci ku sha, I awutə su kəra wa.

¹¹Pazhayeri kəga ntəwulayeri arna ana thləthlatə cangtangnga akwa hwi mbəlkəi. Wala mjir kutakəyirna akwa hwi ra.

¹²Mji na akwa bara kəl mpikəi ana ngga ali dərku, tsuwa mji na akwa bara dəkəi ra ka hilantə ra ana ɓukci akwa ɗəmhə ɗimikur ata kəri.

¹³Amma I namtə kərna apa I twangtwang, I aɗi ana nggar ɗa wa, apa twangtwang tə mnyari amzhi pəlaɓəla su wa.

¹⁴Jiri, I namtə kərna apa mdə tə thləmari ana nggatə su wa, apa mdə na ana mzhi shinangkər ndər wa.

¹⁵Amma I ku mbərsa ka ga, MTHLAKU, tsuwa ga an ata shinau aka dawayeri arna ni, MTHLAKU, gə na Hyelərna.

¹⁶Kamnyar I akwa kiɗa abbər, “Ga aɗiya zhari ka da kumshi ra kamnyar asar na wutə ra wa, wala zhar ɗa ka da kucali ata kəra ndlarna wa!”

¹⁷Kamnyar I abaka ndla, kamnyar parang dzi akwa kətə ra.

¹⁸I ku jikaɓəla ala gə bikayeri tə I hara, ka pəla I ku ɓzi ata kəra suayeri tə I hara ni.

¹⁹Mji hang ku ndzi dawarna kula suari aɗi, tsuwa mji hang na ku nggəlar ra kula suari aɗi.

²⁰Da ana nta ali ɓɗakkur ka ɗimikur, ka ndzi dawarna kamnyar tə I ana bara hara su na kalkalari.

²¹MTHLAKU, ga aɗiya zhar ra shira wa! Hyelərna, ga aɗiya ndzi ciju ka i'i wa!

²²Mwa taktar ka ra dlar ra, MTHLAKU, kamnyar ga andər mbantə ra!