Read bura-pabir Zabura 39 Bible Online

Zabura 39 - bura-pabir bible

Zabura 39

¹Ha ar Dauda aka Yeduthlun na mdər pwar ha. I pəla, “I ata nu su ka hangkal ta mnyi asə vu ra akwa hara biku, I ata hartə mnyi təpu, kəlara sakatə mji na ɗimi adzə ra.”

²I ku dləɓa ka ndzi səri, amma wala tə I ndzi səri ni su aɗi na dlar ra akwa wa, kamnyar təng bwaniyirna ni akwa vərvəra

³Ɗəffi akwa mba ra, antə kəlara sakatə I ku dzama ata kər ɗəffi ana vərvər ɓza. Antə su ngəni ku sə vu tar tə I pəla,

⁴“MTHLAKU, pəla ali hangkur vir na mbila ali akwa duniya ni. Tsuwa nawa antə I ata mtə ri? Pəla ali vir tə mpikəi ata sə kura kəi sənda.”

⁵“Nggədza ga ku namtə farna kwadang apa baukur kutatsi. Far mda aɗi suma ala gə wa. Far kəlara mda ndzi apa mpikəmtar mpikə daci!

⁶“Mpika mdə ndzi apa shanggur na ana ləkəma ka shinardzi daci. Shanga su tə mburu akwa harari kakərkakər ni ata ndzi gapani, mburu ana tsaptə gəna kula səndə mdə na ata sə fatari.

⁷“Antə kulini, MTHLAKU, man tə I ata jaktə səkari ri? Gə duku antə I akwa vəkər ka ga.

⁸Mbantə ra akwa shanga bikərna ni, ga aɗiya hir kəi ndzi sur kumshi aka cakwayeri ni wa.

⁹I ku ndzi diɗi, I aɗi ata ndər kəra wa, kamnyar gə ka kəra ga an vu ra akwa bwani ngəni.

¹⁰Usa, ga aɗiya jaktə ɗi ra kəra wa, I anggitə dlaɓu tə ga akwa hara ali ni kəra wa, I ata mta.

¹¹Ga ana ɗi yeru, ka mpa ala yeru kamnyar bikər yeru, ka kwasəmnya su tə yeru hira apa su tə ləma ana hara. Jiri, mpika mda ana fəi wa, tsa ndzi apa shambar na ana fi ka təramta!

¹²“Nggatə adduwarna bu, MTHLAKU, kara nggatə tuwarna, ga aɗiya hamta kəma ga ta shimwiyirna wa. Kamnyar I adzə nga apa mətəpiyir nga, tsu apatə kəkayeri arna ku si ka təra.

¹³Zhar ɗi ra apani ɓu, kəi ɗar nggatə msəra, akwabə I amta, kəi zhar duniya.”