Read bura-pabir Zabura 40 Bible Online

Zabura 40 - bura-pabir bible

Zabura 40

¹Ha ar Dauda aka mdər pwar ha. I ku mbwi ɗəffi akwa səkə dlar tə MTHLAKU ata sə hara ali, tsa ku psi thləm ali ka nggatə tuwarna.

²Tsa ku ndəkərɓəla ra akwa kur mta, akwa maɓu na ata ndasəmnya mda. Tsa vəi ra catu ata kəra pela na ola, vəi tə asar aɗi na ata tsəkwar ra wa.

³Tsa ku ni ha bilən kəi hara, kəi hara har huwa aka Hyelər mburu. Mji hang ata wutə su tə tsa hara ni ka ndatədzi, antə da ata mbərsa ka MTHLAKU.

⁴MTHLAKU ana vədzə barka aka mji na ana mbərsa ka tsa, mji na aɗi ana paktə kər ka mjir gaya wa, wala paktə kər ka mjir nu haptayeri wa!

⁵Ga ku hara surndatayeri hang, MTHLAKU na Hyelərna! Mda aɗi na amzhi jikatə suayeri tə gə ɗəmhə kamnyar yeru wa, wala I kəɗari abbər kəi jikatə ɗa, I amzhi hara su adzə shang wa!

⁶Ga ku hara tə I nggaɓəla abbər aɗi saɗaka wala sur hamta, antə ga akwa barari wa, wala saɗakar kəcimta biku wa.

⁷Antə I pəla, “Nggədza ra, I ku si, apatə mdə ku rəbuta ata kəri akwa kakaɗər nga, abbər,

⁸‘I ana nggatə msərakur hara su tə gə hira, Hyelərna! I ku kəsi tsawur nga akwa ɗəffi.’ ”

⁹I ku pəla labar na msəra akwa tsaptədzi na ola ar mjir nga, abbər ga ku mbantə yeru. Ga asənda, MTHLAKU, abbər I aɗi ata dləɓa ata kəra labar ni wa.

¹⁰I aɗi kəsi labar mbantədzi ni aka kəri daci wa, parang I akwa gari ata kəra jirkur ka dunar mbantə mda tə gə kəgari. I aɗi ɗar dləɓa ata kəra hirkurər nga ka jirkurər ngə ni wa, I ana ngkər ɗa aka mjir nga na tsaptədzi akwa vəngkər səli ala ga.

¹¹MTHLAKU, ga aɗiya zhar ta kətadzə ra wa. Ndzi ka hirkurər nga na ana palidzi wa ni ni ka jirkurər ngə ni tsəlpi ra!

¹²Asarayeri zumzum hang tə mda amzhi jikatari wa ku tsaɓəngkərdzi ali. Bikayeri arna ku hartə bwakəmi tə I amzhi wutə su wa, Da ku təramta hangkur shishir kəri, antə dzi ku mti.

¹³Dlar ra bu, MTHLAKU, usa kara mbantə ra! Mwa taktar, usa ka gə dlar ra!

¹⁴Hara ka mji na akwa bara kəl mpikəi ni ndəndatədzi ka ləkwa səli. Vu ka mji na akwa bara ka da dəkəi ra ni shinardzi ka təra ka səli akwa nca ɗa.

¹⁵Nggyari mji na ana hara kuya ali ni ka da ngka avəyar ɗa akwa səli.

¹⁶Amma ka gə hara ka mji na ana vəngkər səli ala gə ni, nggatə msəra ka hara kucali. Hara ka mji na ana bara abbər ka ga an mbantə ɗa ni pəla tədəku abbər, “MTHLAKU ni ol kadzang!”

¹⁷Arna I mdər bwani ka mdər tursu, amma MTHLAKU, ga ana ɗangtə ra. Ga andər dlar ra ka mdər mbantə ra. Aiyi Hyel, mwa kara dlar ra bu!