Read bura-pabir Zabura 41 Bible Online

Zabura 41 - bura-pabir bible

Zabura 41

¹Ha ar Dauda aka mdər pwar ha. Arɗa msəra ala ɗa, da na ana dlar mjir bwani, MTHLAKU ana msərantə ɗa kəlara sakatə da ləkwa bwani.

²MTHLAKU ana ɓəlatə ɗa ka tsəlpi mpika ɗa, tsa ana hara ka ɗəffa ɗa ndzi msəra ala ɗa akwa tsəɗi ni, tsa aɗi ata zhar ɗa aka dawayeri arɗa wa.

³Wala ma da an hara nggawa MTHLAKU ana dlar ɗa ka mbantə ɗa akwa shanga su na akwa damitə ɗa.

⁴I pəla, “kətadzə ra kara mbantə ra, MTHLAKU, kara mbantə ra, kamnyar I ku hara ala gə biku!”

⁵Dawayeri arna akwa pəla su na ɗimi ata kəri abbər, “Nawa tə tsa ata mtə ri ka mdə fwari ata kərari?”

⁶Da ana sə thlawar ra apa da mji na pwa, amma tsa akwa dzamər laku tə ka tsa dəkəi ra akwa. Tsa si kamnyar ka da wutə labar na ɗimi ata kəri, ma da ləɓəla ka tsa ra titilari akwa kəlara bwa.

⁷Shanga dawayeri arna ana cicuh su ata kəri aka nvwa ɗa, da ana bara ka su na ɗimi ta shang wutə ra.

⁸Da ana pəla, “Barka! Shilkər mta ku ngkəi ni, tsa aɗi ata thlata akwa nggawakur ngəni wa.”

⁹Wala pazhirna na kər ka nggilang, tə I mbərsa ka tsa, natə yeru ana səm susəma ata kəma duku ku shinadzə bwahili ali.

¹⁰Kətadzə ra, MTHLAKU, kara mbantə ra, har kəi mzhi ntəmta ɗimikur tə dawayeri arna hara ali ni!

¹¹Apani antə I ata sənda abbər gə hir ra, tə ga aɗi zhar ka dawayeri arna nggyari ra wa.

¹²Ga ata dlar ra kamnyar I ana hara su na kalkal, tsuwa ga ata hara kəi ndzi akəma ga har ba saka madi.

¹³Fwal gir MTHLAKU na Hyelər Israila, Fwal gir ni baɗitə kulini har ba saka madi! Amin, Amin.