Read bura-pabir Zabura 42 Bible Online

Zabura 42 - bura-pabir bible

Zabura 42

¹Aka mdər pwar ha. Ha ar maɗashilər nyarmbwar Kora kamnyar thlipə su aka mji. Apatə mbəkəl kimar ana bara zərkər yimi na mtathlaku, antə I ana bara nga, Hyel.

²Apatə mdə na ka thləli ana nggukə yimi, antə I akwa nggukə nga, Hyel na ka mpika. Nawa antə I ata mwari akəma ga ka vəngkər səli ala gə ri?

³Pci ka viri I akwa tuwa shimwi an susəmərna daci. Tədəku dawayeri arna ana yu ra abbər, “Hyelər ngə ni ama ri?”

⁴Kəlara sakatə I ɗangtə su nayeri ni, ɗəffi ana ɓza, sakatə I ana pwa akəma dlamar mji ka yeru mwari akwa mbwar Hyel, sakatə dlamar mji akwa usar nga ka ha, ka hara kucali ka kuraku ni. Ngəni an vir hu Hyel na ola tə mji ana ɓəla!

⁵Kamnyar mə tə ɗəffi ana ɓzə ri? Kamnyar mə tə dzi ana mta ata kəra su apani ri? I ata mbərsa ka ga, Hyel, antə I ata sə jaktə hu nga ka damwa, kamnyar ga a Hyelərna ka mdər mbantə ra.

⁶Jiri ɗəffi ku ɓzi ka duna, antə I ata ɗangtə ɓɗakkur tə gə hara ali, akwa tsəɗi Jodan, ka Hermon, ka gar Mizar.

⁷I akwa ngga kurakər mpa yimayeri, apatə mpar yimi akwa si ka duna ka tsa fatə ra, tsa si ka təra ata kəri akwa mula ali.

⁸Təpci MTHLAKU ana ncantə hirkurərni na ana palidzi wa kamnyar kəi mzhi hara ha ma viri ku hara, ka hara adduwa ala ga, gə na Hyel na mthlakər mpikəi.

⁹I akwa tuwa aka Hyel na ana ngkamta ali asar abbər, “Kamnyar mə tə gə fwari ata kəri ri? Kamnyar mə tə tar ka dawayeri arna hara bwani ali kəi ndzi akwa tuwa parang nə ri?”

¹⁰Mnya ɗimi tə da akwa harari ata kəri ni akwa damitə ra apa shilkər mta. Tədəku da akwa ngga mnyi abbər, “Hyelər ngə ni ama ri?”

¹¹Kamnyar mə tə ɗəffi ana ɓzə ri? Kamnyar mə tə dzi ana mta ata kəra su apani ri? I ata mbərsa ka ga, Hyel, antə I ata sə jaktə hu nga ka damwa, kamnyar ga andər mbantə ra.