Read bura-pabir Zabura 44 Bible Online

Zabura 44 - bura-pabir bible

Zabura 44

¹Aka mdər pwar ha. Ha ar maɗashilər Kora kamnyar thlipə su aka mji. Hyelər yeru, yeru ku psi thləma yeru ɓɗaku ka nggatə su tə kəkayeri ar yeru pəla ala yeru, ata kəra surndatayeri na ol'ola tə gə hara akwa sakar ɗa, akwa zaman na waci:

²Ga ku kədləɓəla durayeri damwa, ka pwi mjir nga akwa tsəɗiyir ɗa. Ga ku nar bwani aka durayeri damwa, amma ar mjir nga ga ku na ɗa gəna.

³Aɗi ka katsakar antə mjir nga səm tsəɗi ni wa, tsuwa aɗi ka dunar ɗəva antə da nggyari ɗa wa. Amma atar kuthlikurər nga ka dunar nga antə da wuta, tsuwa ga an carɓəla abbər ga ata hir ɗa atar ndzi ata vəi duku kəga da.

⁴Ga an kuthlirna ka Hyelərna, na ku hamta nggyari su aka mjir nga.

⁵Atar dunar nga antə yeru ku ntsəɓəla dawayeri ar yeru akwa thləma ga antə yeru ku ntsəntsarəmta mjir fa səla yeru.

⁶Kamnyar I aɗi ana mbərsa ka laliyirna wa, tsuwa I aɗi ana mbərsa abbər katsakarərna ata mzhi mbantə ra wa.

⁷Amma ga an msərantə yeru ta dawayeri ar yeru, ka pu mji na nggəlar yeru akwa sur səli.

⁸Hyelər yeru, ga an afər gayar yeru, antə yeru ata usar nga ba saka madi.

⁹Amma kulini ga ku nggəlar yeru ka kəli səli yeru. Ga aɗi ana ləɓəla ka sojayeri ar yeru akwa mpa kəra wa.

¹⁰Ga ku hara tə yeru ku shinardzi ka hwi aka dawayeri, antə da ku famnya sur yeru.

¹¹Ga ku zhar tə mdə thlagamta wulya yeru apa təma, ka titiləmta bwadukwa yeru akwa tsəɗiyayeri damwa.

¹²Ga ku ɗələmta mjir nga ata kəra masər su na tingnga, apa dlu da aɗi suma ala gə wa.

¹³Ga ku hara tə yeru ndzi sur nggənggəla aka durayeri na adzə yeru, antə da ana kumshi yeru ka hara kyartəkur ala yeru.

¹⁴Ga ku vu tə yeru ku ndzi sur ngkəra na ɗimi ala ɗa tə da ana rutə yeru ka kənggələmta kəra ɗa.

¹⁵Tədəku mda akwa kəli səliyirna, antə I awutə vəi pwi kəmi wa kamnyar sur səli.

¹⁶Su damwa aɗi tə yeru ana nggatə wa tar nggənggəla ka kyartəkur. Su damwa aɗi tə yeru ana wutə wa tar dawayeri na hir ntə dawa.

¹⁷Shanga su nayeri ni ku wutə yeru, wala tə yeru aɗi fwari ngə wa, wala ɓəli alkawal tə gə hara ala yeru wa.

¹⁸Yeru aɗi ɗar zhar nu ngə wa, wala ɓəli tsawur ngə wa.

¹⁹Amma wala apani ga ku ɓəgəli duna yeru ka pumta yeru akwa nca mwaɓimtaku, ka təra kazhar yeru akwa kuthlu na pələku.

²⁰Ma yeru an zhar vəngkər səli aka Hyelər yeru, ka vəngkər səli aka haptu,

²¹ai ga ata səndari, kamnyar ga səndə shanga su na akwa ɗəffa yeru.

²²Ai ga sənda abbər kamnyar nga antə mda akwa tsəgəi yeru tədəku, mdə namtə yeru apa təma tə mda akwa bara thla wulyari.

²³Thlata, MTHLAKU! Kamnyar mə tə ga akwa heni ri? Thlata! Ga aɗiya nggəlar yeru ba saka madi wa!

²⁴Kamnyar mə tə ga akwa ɗuwardzi ala yeru ri? Ga aɗiya hamta kəma ga kazhar bwani tə dawayeri ar yeru akwa hara ala yeru ni wa.

²⁵Kamnyar yeru ku ndlagamtadzi ata di, ka diɓərantə kəma yeru akwa bərbər.

²⁶Mwa ka gə dlar yeru! Mbantə yeru kamnyar hirkurər nga aɗi ana palidzi wa ni.