Read bura-pabir Zabura 45 Bible Online

Zabura 45 - bura-pabir bible

Zabura 45

¹Aka mdər pwar ha. Ha ar maɗashilər Kora kamnyar thlipə su aka mji. Ha ar hirkur tə ka mdə hara ka yimər kurakər “Kudlayeri.” Ɗəffi ku nghyi ka ndərayeri na msəramsəra, sakatə I akwa thla ha ngəni aka kuthli ni. I ata thla ha na msəra aka kuthli, kamnyar kyanggyari ndzi apa biro ar mdər rəbuta na masəku.

²Ga an dakwi ta shang akwa nca mji, ga asəndə gari na msəra ka duna. Hyel ku vədza ala gə barka na har ba saka madi.

³Kətə katsakarər nga, katsala ragai! Ga an kuthli na ola na ka səli!

⁴Fəltə takur nga, bundi, ka gə ləɓəla ka mpamta su, ka gə wuta abbər mji akwa hara su na kalkal ka jirkur, ka kanaɗikur. Ka duna gə vu ka gə hara suayeri ol'ola na ata ndatə mda.

⁵Shanga afayeri ar nga tsəltsəlari, da ana ntsəvəmta ɗəffa dawayeri ar' nga, ka mjir tsəɗiyayeri zumzum ndlagamtadzi akəma ga.

⁶Kuthlikur tə Hyel na gə ni ata ndzi har ba saka madi, antə ga ata hara kuthlikur ata kəra mjir nga ka jirkur.

⁷Gə hir su na kalkal, ka nggəlar ɗimikur. An su na hara tə Hyelər ngə carɓəla ngə ka na gə msərakur na təramta ar shanga kuthlyayeri damwa ni.

⁸Ləptayeri ar nga akwa shiwur msəra kamnyar tulari mur, ka aloe, ka kassiya. Mjir tsa su akwa fwal nga akwa kəi kuthlikur tə mdə dəɓatə ka thlira ciwar ni.

⁹Kwatamayeri aɗi akwa nca mwankir kutakəyir nga, tsuwa abwa mazəma ga mwalangkiri andzəndzi, hahari ka kari dəɓa ar dinar na ɓɗakta shang.

¹⁰Psi thləma ga, ngkwarna, kara nggatə su tə I ata pəlari, fwari ata kəra mjir kutakəyir nga shang kəga yangkura ga.

¹¹Antə kuthli ata wutə dakwikurər nga ka nggukə nga. Antə kara səlitə ni kamnyar tsa ku ndzi mdərkəyir nga.

¹²Mjir Taya ata sə sənta ala gə cautayeri, mjir gəna ata sə bara mastə hangkala ga.

¹³Kwatam na amaliya ni ku dəɓamtadzi ambwarngkiɗa, tsa dakwi ka duna! Mdə tsa ləptər kəldzərni ka puwar dinar.

¹⁴Akwa kari dəɓa ngəni tə tsa hatə ni, antə mdə səntə ni aka kuthli, ka maɗangkwi na gwarkərni akwa pwar ni.

¹⁵Antə shanga mji ku pwar ɗa akwa ləvəyar kuthli ka kucali ka ɗəffu mwapu

¹⁶Gə na kuthli, maɗashilər nga ka kəkayeri ar nga ata sə ndzi kuthlyayeri tsu apa kəkayeri ar nga na waci. Ga ata sə vu ka da hara kuthlikur ata kəra shanga duniya.

¹⁷I ata vu ka mdə ɗangtə ɓɗakkur tə gə hara akwa shanga zamanayeri, antə shanga mji ata sə hu nga har ba saka madi.