Read bura-pabir Zabura 46 Bible Online

Zabura 46 - bura-pabir bible

Zabura 46

¹Ha ar maɗashilər Kora aka Mdər Pwar ha, natə ka mdə hara ka kurakər maɗangkwi. Hyel an vəi ɗuwardzər mburu ka duna mburu tədəku tsa ɗəmhəɗəmhari kamnyar dlar mburu akwa sakar bwani.

²Antə mburu aɗi ata thlivər wa, wala ma duniya an ata kənggərantədzi, wala ma garayeri an ata bəzəka ka pudzi akwa manda na zurang,

³wala ma ɗəffa manda ni an ata mbwa ka mpa, wala ma garayeri an ata kənggəra ka kuraku, sakatə yimi ni akwa thlatə ka pu kərni ka duna ni.

⁴Thlyagha laga aɗi natə yimərni ana vu ka mji na akwa bərni Hyel ni hara kucali, tsuwa ngəni an vəi ndzəndziyir na ka Səli ta Shang.

⁵Hyel akwa bərni ni, ba saka madi su aɗi na ata tsəkwar bərni ni wa, Hyel ata ɓəlatə ni tsu tə vəi ɗəm.

⁶Tsəɗiyayeri akwa thlivər ka duna, kuthlikurayeri akwa kənggəra, Hyel ku dləra, antə duniya ku juwidzi.

⁷MTHLAKU na ka Duna ta Shang an adzə mburu. Hyelər Yakub an vəi ɗuwardzər mburu.

⁸Asər giri ka giri wutə surndatayeri tə MTHLAKU hara, wul giri laku tə tsa hara tiltil ka su na ata kəra duniya.

⁹Tsa ku thləthlatə ka mpa akwa shanga duniya, ka ɓəgəlwa laliyayeri, ka hwukthləmta mwasayeri, ka mbagamta partauwayeri ka u'u!

¹⁰Hyel akwa pəla, “Zhar giri mpa ni, ka giri sənda abbər I an Hyel, na olta shang akwa shanga tsəɗiyayeri, na olta shang akwa duniya.”

¹¹MTHLAKU na ka Duna ta Shang an adzə mburu. Hyelər Yakub an vəi ɗuwardzər mburu.