Read bura-pabir Zabura 5 Bible Online

Zabura 5 - bura-pabir bible

Zabura 5

¹Ha ar Dauda aka mdər pwar ha tə ka mdə hara ka shwalayeri. Psi thləm ali bu, MTHLAKU, kara nggatə nggyinggyi tə I akwa harari.

²Psi thləm aka tuwarna, kara dlar ra, kamnyar ga an Hyelərna ka kuthlirna! Kamnyar akəla ga, antə I akwa kiɗa.

³MTHLAKU, parang ɗəɗəpa ga ana nggatə adduwarna, ɗəɗəpə mbing tə I akwa ɗəmhə saɗaka ala ga, kəi səkə amsa akəla ga.

⁴Ga aɗi Hyel na ana kucali ata kəra ɗimikur wa, kamnyar ga aɗi ana dlu ɗimikur wa.

⁵Mjir gaya anggitə si akəma gə wa, ga aɗi ana hir mjir hara ɗimikur wa.

⁶Ga ana shamta shanga mjir thlandəra, ka rutə mji na hir mpa ka pwaktə mda.

⁷Amma kamnyar hirkurər nga na ana palidzə wa, I ata mzhi si akwa mbwar nga. I ata mzhi vəngkər səli ala ga akwa mbwar nga, kəi zuzuri akəma ga ka thlivəra.

⁸Ga ana hara su kalkal, MTHLAKU, antə I akwa kiɗa akəla ga ka gə pwar ra, ta dawayeri arna anggyari ra. Pəla ali su tə kəi hara, ka laku tə kəi nuwa.

⁹Kamnyar jirkur aɗi akwa mnya ɗa wa, su tə da ana bara an ka da hilantə mda. Fulama ɗa msəra akwa pwaktə mda, da ndzi apa ku na ɗimi tə mdə ɗuwari.

¹⁰Vəngkər ala ɗa bikər ɗa, ka gə ɗi ɗa Hyel, ka ɗimikurər ɗa ngka ata kəra ɗa sur ɗa. Kədləmta ɗa kamnyar bikər ɗa ku hara hang, kamnyar da ana hara kər ɓəɓalkur ala ga.

¹¹Amma ka shanga mji na ana ɗuwardzi adzə nga hara kucali, ka da mzhi hara har kucali tədəku. Ka gə ɓəlatə mji na hir nga, kamnyar ka shanga ɗa nghyi ka kucali.

¹²Ga ana vədzə barka aka mji na pwa, MTHLAKU, gə hir ɗa, antə ga ana ɓəlatə ɗa apa partau.