Read bura-pabir Zabura 50 Bible Online

Zabura 50 - bura-pabir bible

Zabura 50

¹Ha ar Asaf. MTHLAKU na Hyel na ka Duna ta Shang akwa gari, tsa akwa kəga shanga mji baɗita akwa raghəi ka mwanta aka ramta.

²Akwa Sihiyona, bərni na nghyinghyari ka ɓɗakkur antə parakər səliyir Hyel akwa mbəlmbəla.

³Hyelər mburu akwa si ka kurakər dləra, tsa akwa si ka u'ur mtakəu akəmari, kalakkalakari ka shambar yimi na mwavər.

⁴Tsa ata ndəra aka vəi na amtazi ka duniya ka da ndzi seɗarni, sakatə tsa ata hara shariya aka mjirni.

⁵Tsa pəla, “Tsaptə giri ali mjirna na ka jirkur, mji na ku mbwi alkawal ka iya atar hamta saɗaka!”

⁶Vəi na amtazi akwa psəmnya abbər Hyel ana hara su kalkal, abbər tsa ka kərari surni an alkali ni.

⁷“Psi gir thləma giri, mjirna, antə I ata gari I ata pəla bikayeri tə giri hara, mjir Israila. I an Hyel, na Hyelər giri.

⁸I aɗi akwa mpa ala giri kamnyar saɗakayeri ar giri wa, wala kamnyar saɗaka mbamba tə giri ana sənta akəmi tədəku ni wa.

⁹Amma wala apani I aɗi akwa tur gyal ar ciɓər giri wa, wala nciwa ar dləmar giri wa.

¹⁰Kamnyar shanga mwaɓimtaku an arna, ka shanga thlayeri na ata garayeri dəpu dəpu.

¹¹I asəndə shanga ɗikayeri na akwa mtakəu, tsuwa shanga mwaɓimtaku an arna.

¹²“Wala ma məi an ata kətə ra, I aɗi ata pəla ala giri wa, kamnyar duniya ka shanga su na akwa an arna.

¹³I ana səm kum gyalayeri, wala sa mamshir kwiyayeri ya?

¹⁴Hamta gir saɗakar usa aka Hyel, ka giri ntəmta su tə giri kətə alkawalari aka na ka Səli ta Shang.

¹⁵Ka giri ndəra ali ma vir tə asar ku si ata kəra giri, antə I ata msərantə giri antə giri ata sə ni səli.”

¹⁶Amma Hyel akwa pəla aka mji na kəmanggar, “Kamnyar mə tə giri ana kəsi tsawayeri arna ata mnya giri ri? Kamnyar mə tə giri ana namta apa giri mjir ɓəla alkawalərna nə ri?

¹⁷Kamnyar giri aɗi ana hir ka mdə ɗi giri wa, tsuwa giri ana nggəlar tsawayeri arna.

¹⁸Ma giri wutə həla, giri ana ndzi pazhi ka tsa, tsuwa giri ana mwardzi kəga mjir ləka.

¹⁹Tədəku giri ɗəmhəɗəmhari kamnyar ngkər ɗimikur, tsuwa giri hir thlandər tədəku.

²⁰Giri ana ndzəndzi ka gari na ɗimi ata kəra ɓzərma' giri, ka nggənggəl mdə tə mama' giri duku ka tsa.

²¹Giri ku hara shanga su nayeri ni, tsuwa I aɗi ndəra ata kər wa, antə giri kəta abbər surharar mburu duku kəga giri. Amma kulini I akwa mpa ala giri, ka ncanta ala giri bikər giri ata bəbal.”

²²“Psi gir thləm aka ngəni, giri na aɗi ana damitədzi ka i'i wa, ma apani wa I ata shamta giri, antə mda aɗi na ata mbuli giri wa!”

²³“Kəlara mdə na akwa hamta ali saɗakar usa, tsa akwa ni olkur tsuwa kəlara mdə na ata hara su akwa laku na kalkal, I ata mbantə ni.”