Read bura-pabir Zabura 51 Bible Online

Zabura 51 - bura-pabir bible

Zabura 51

¹Ha ar Dauda aka mdər pwar ha. Sakatə Naɓi Nathlan ku si adzə ni aghəla tə tsa ku bara Bathsheba na mwala' Uriya. Kətadzə ra Hyel, kamnyar hirkurər nga aɗi ana palidzi wa. Cajimta ali bikayeri arna usa, apatə ga ana kətadzə mda ka duna!

²Kəcimta ali vəi ɗimikurərna kəi ndzi caucau, ka gə namtə ra kəi ndzi kəcəkəcari kula biku!

³Kamnyar I ku nggaɓəla bikayeri arna, tədəku I ana ɗangta abbər I ka biku.

⁴Ala gə shinga antə I ku hara biku ni, ka hara su na ɗimi ata nca ga. Antə su tə gə pəla ata kəri ni kalkal, tsuwa gə ka jirkur akwa shariya tə gə thlamta ata kəri ni.

⁵Kamnyar I mdər biku təng akwa sakatə mdə yaɓəla ra, I baɗitə hara biku tsu akwa sakatə mama'na kətə hurərna.

⁶Amma su tə ga ana bara an jirkur na akwa ɗəffa mda, antə thlipa ali su kəi ndzi ɗəɗu.

⁷Kəcəɓəla ali bikərna, antə I ata ndzi kəcəkəcari, kəcimta ra antə I ata ndzi mwapu ta mpurpuwa.

⁸Hara kəi jaktə kucali ka nggatə msəra! Ga ku ɓəli səli ka namtə ra kula duna, kulini ndzi kəi hara kucali

⁹Kələmta nca ga kazhar wul bikərna, ka gə cajimta shanga ɗimikur tə I hara.

¹⁰Namtə ka ɗəffi ndzi kəcəkəcari, Hyel, ni mambəl damwa bilən ka ɗəffu na ana shina wa.

¹¹Ga aɗiya kədləmta ra kazhar kəma gə wa, tsuwa ga aɗiya kələmta dunar nga kazhar yeru wa.

¹²Hara kəi jaktə kucali apa sakatə gə mbantə ra nda, kara na ali ɗəffər kələngkər ala ga.

¹³Antə I ata sə thlipə tsawur nga aka mjir biku, har ka mjir biku ni sə ngka adzə nga.

¹⁴Msərantə ra, Hyel, ta mjir bara kəl mpikəi ni, kamnyar gə duku an ka dunar mbantə ra, antə ɗəffi ata ndzi msəra ali kəi psəmnya ɓɗakkurər nga.

¹⁵Kəlar mnyi, MTHLAKU, kamnyar kəi mzhi fwal nga.

¹⁶Ga aɗi ana nggatə msərakur saɗaka wa, tsuwa saɗaka mbamba aɗi ana kəskəra gə wa, ma an apani wa, sakani I ata hamta ɗa ala ga.

¹⁷Saɗaka na jirari tə ga ana bara an kanaɗikur, ga ana bara mdə natə ɗəffari ana ɓzə kamnyar bikərni ka mdə na ka ɗəffər tubi.

¹⁸Hara ɓɗakkur aka Sihiyona apatə gə hira, kara jaktə həntə katanggar Urushalima.

¹⁹Antə ga ata sə nggatə msərakur saɗaka na kalkalari, saɗaka mbamba ka saɗaka tə mda ana mbamta swakti, antə mda ata sə jaktə hamta ala gə saɗakar gyalayeri ata vəi hamta saɗaka.