Read bura-pabir Zabura 53 Bible Online

Zabura 53 - bura-pabir bible

Zabura 53

¹Ha ar Dauda aka mdər pwar ha, natə ka mdə hara ka dzama, ka kurakər shwala. Caku ana pəla akwa ɗəffari abbər, “Hyel aɗi wa.” Da an mji hilhila, antə surharar ɗa an sur cika na ɗimi. Mda aɗi wala duku na ana hara su kalkal wa.

²Hyel na amtazi ana haghəi ncari akwa duniya ka wul mji abbər nuhum tsa awutə mdə wala duku na ɗəɗu, mdə na ana bara Hyel.

³Amma shanga ɗa ku shinardzi kazhar Hyel, shanga ɗa ku ndzi dlərpu. Mda aɗi wala duku na akwa hara su ɓɗaku wa, mda aɗi wala duku wa.

⁴Hyel akwa pəla, “Mjir hara ɗimikur ni aɗi ana thliptə su wa ya? Da ana səm mdəkur mjirna apa da akwa kwasə buradi, tsuwa da aɗi ana hara adduwa ali wa.”

⁵Amma ndzi hyala ɗa ata nthlə ɗa ai, apa su aɗi na ɗar thlivərantə ɗa shang wa. Kamnyar Hyel ata kurəmta dawayeri ar mjirni ka titiləmta ɗethlər ɗa, antə da ata ləkwa səli, kamnyar Hyel ku nggəlar ɗa.

⁶I akwa kiɗa abbər ka Hyel na akwa Gar Sihiyona si ka tsa mbantə mjir Israila. Ma sakatə Hyel ku ngka ka da akwa tsəɗiyir ɗa, antə Kutakəyir Yakub ata sə hara kucali, antə ɗəffa mjir Israila ata ndzi msəra ala ɗa!