Read bura-pabir Zabura 55 Bible Online

Zabura 55 - bura-pabir bible

Zabura 55

¹Ha ar Dauda aka mdər pwar ha, natə ka mdə hara ka dzama, ka hangkir surtsayeri na ka səwa. Psi thləm aka adduwarna, Hyel ragai, ga aɗiya nggəlar ngga kiɗərna wa!

²Psi thləm ali, kara amsa ali, kamnyar damitədzərna ku təra duni, antə hangkali aɗi wa.

³Dawayeri arna akwa harangkər kuraku ali, da akwa thlivərantə ra ka ndərayeri na ɗimi ɗimi. Da akwa ndəkərəngkər ali bwani, ka nu ra ka ɗəffu akwa nggənggəl ra.

⁴Ɗəffi ɓzəɓzari ka duna, I akwa thlivər abbər I ata mta.

⁵Thlivər ku ngkəi ra har dzi akwa kədza, I akwa thlivər ka duna.

⁶Ma abbər I an ka ɓəɓəku apa bukəl. I ata fəla ka təra kəi ra paktə vəi ghərəmtaghəra.

⁷I ata fəla kəi təra ciju kəi ra həntə kəyirna akwa mtakəu.

⁸I ata mwa taktar kəi ra paktə vəi ɗuwardzi, ta shambar ka yimi na mwavər.

⁹Huzamta ɗimikur tə da ɗəmha, MTHLAKU, kara ndəndatə mnyar ɗa. Kamnyar I akwa wul mpa ka haptər hangkal akwa bərni ni.

¹⁰Pci ka viri da akwa mwa ata kəra katanggar di ni ka kalaktə di ni apa da mjir səka, ka nghyantə kutadi ni ka ɗimikur ka sur thlentə hangkal.

¹¹Da akwa hilantə su akwa kəlara bwa, da akwa zamba ka nar bwani aka mji ata laku ka akwa kasəku.

¹²Ma abbər dawarna an akwa mnya ɗimi ali ni, sakani tsu I ata nggitari, ma abbər dawarna an akwa rutə ra ka nggənggəl ra ni, sakani I ata ɗuwardzi ta tsa.

¹³Amma na akwa hara su ni an gə na mdər dzi, mdər kəthlər nvwa ra ka pazhirna na kudzəha.

¹⁴Mwa ana gari na msəra aka dzi, ka mwari akwa mbwar vəngkər səli ata kəma duku.

¹⁵Ka Hyel dlar ka mtə fatə dawayeri arna kula səndər ɗa, ka mdə harəmta ɗa tsu ka mpika, kamnyar ɗimikur ku həntə kəyirni akwa ɗəffa ɗa.

¹⁶Amma arna I akwa kiɗa abbər ka MTHLAKU na Hyel dlar ra, tsuwa MTHLAKU ata mbantə ra.

¹⁷Ɗəɗəpa, təpci ka tahaku I akwa nggungguni ka tuwa alari abbər ka tsa dlar ra, antə tsa ata nggatə kurakəi.

¹⁸Tsa ata mbuli ra ka zhar ra lapiya akwa mpa tə I akwa harari kəga dawayeri arna na hang ni.

¹⁹Hyel na ka kuthlikur təng akwa baɗitər su, ata nggatə ra ka nggyari ɗa ali. Kamnyar da aɗi mji na ana pali surharar ɗa wa, tsuwa da aɗi ana thlivər Hyel wa.

²⁰Pazhirna na sakanda ku pwa ata kəra pazhayeri arni ka mpa, ka ɓəli alkawalər pazhikur.

²¹Mnyari msəra apa cirməma, amma akwa ɗəffari tsa aɗi akwa hir mdə wa. Ndərərni mtathlaku apa yimi, amma da ana thla mda apa reza.

²²Pəla su na akwa damitə nga aka MTHLAKU, antə tsa ata wulwul nga, tsa aɗi ata zhar ka su mula aka mdə na pwa wa.

²³Amma Hyel, ga ata mwantə mji na kəmanggar akwa kula, mjir tsi mda ka mjir thlandəra ata mtə sakatə da tsu maɗangkyar, amma arna I mbərsa ga ata mbantə ra.