Read bura-pabir Zabura 56 Bible Online

Zabura 56 - bura-pabir bible

Zabura 56

¹Ha ar Dauda aka mdər pwar ha akwa sakatə mjir Filistiya ku ngkəi Dauda ahar Gath. Ka mdə hara ha ngəni ka kurakər Bukəl Twangtwang na akwa Tsəɗi na Ciju. Kətadzə ra bu, Hyel ragai, kamnyar dawayeri akwa kədlə ra ka ɗəffu, da ana ɓukci akwa hara bwani ali.

²Dawayeri arna ana ɓukci akwa nu ra ka da dlaɓu ra, kamnyar mji hang an akwa mpa ra kula thlivəra.

³Kəlara sakatə thlivər ku ngkəi ra, I ana mbərsa ka ga.

⁴I ana mbərsa ka Hyel, antə I aɗi ata thlivər wa, I ana fwal ni kamnyar alkawal tə tsa kəta abbər tsa ata mbantə ra. Man su tə mdə ndzang ata mzhi hara ali ri?

⁵Dawayeri arna ana ɓukci akwa bara ndwali su tə I pəla, parang da akwa ɗəmhə laku tə ka da dəkəi ra.

⁶Da ana tsaptədzi akwa vəi ɗuwarɗuwari, ka da wul su tə I ata harari, kamnyar da akwa bara ka da tsi ra.

⁷Hyel, ga aɗiya zhar mji na ɗimi ni kula gə ɗi ɗa wa, kurəmta ɗa kamnyar ɗəffa gə na ɓza adzə ɗa.

⁸Ga asəndə shanga bwaniyayeri tə I tərkwa ka tərɓəla, ga ku tsaptə shanga shimwiyirna akwa kwalɓa, ka rəbutə hangkurər ɗa akwa kakaɗər nga.

⁹Kəlara sakatə I ku hara adduwa ala ga, dawayeri arna ana shinardzi ka hwi təra. Atar ngəni antə I sənda abbər ga adzə ra.

¹⁰I akwa hu nga, Hyel, kamnyar ndərər nga. Jiri, I akwa hu ngə, MTHLAKU, kamnyar ndərər nga.

¹¹I ku mbərsa ka Hyel, antə I aɗi ata thlivər wa. Man tə mdə ndzang ata mzhi hara ali ri?

¹²Hyel, I ata nghyaɓəla alkawal tə I kəta ala ga, I ata səntə cautayeri kamnyar usar nga.

¹³Kamnyar ga ku mbuli ra ata mnya mta ka ngkatə ta su atsamta səli ka ndlamta ra. Antə I akwa mzhi mwa kamnyar dunar nga na akwa tsəlpi ra, akwa parakər nga na ana ɓəlatə mpika mji.