Read bura-pabir Zabura 59 Bible Online

Zabura 59 - bura-pabir bible

Zabura 59

¹Aka mdər pwar ha, ka mdə hara ka kurakər “Ga Aɗiya Ɓzamtə Wa.” Ha laga zum tə Dauda hara aghəla tə Shawulu thlentə mji ka da səka kəyir Dauda kamnyar ka da tsi ni. Msərantə ra ta dawayeri arna, Hyel, ɓəlatə ra ta mji na akwa bara tsi ra!

²Msərantə ra ta mjir hara ɗimikur, kara ɓəlatə ra ta mjir tsi mda.

³Kamnyar nggədza ɗa akwa thla ra ka da tsi ra, MTHLAKU, dawayeri na kula kətadza an akwa pangkərdzi ali, wala tə su aɗi tə I ɓzamta ala ɗa wa.

⁴Su aɗi tə I ɓzamtə wa, amma wala apani da akwa ɗəmhədzər tsi ra. Mwa kara dlar ra, MTHLAKU! Wul jili bwani tə I akwa ɗarari bu!

⁵MTHLAKU, Hyel na ka Duna ta Shang, Hyelər Israila, Mwa kara ɗi shanga durayeri na asəndə ngə wa, ga aɗiya kətadzə mjir hara ɗimikur wa!

⁶Da ana si tahaku tahaku ka kurakər mpa apa kila, ka da kadla akwa kutadi.

⁷Ngga jili ɗimikur na akwa səɓəla akwa mnya ɗa. Ndərayeri na ata ntsəvəi mda an akwa səɓəla akwa mnya ɗa, da tamata abbər mda aɗi na akwa ngga ɗa wa.

⁸Amma ga ana kumshi ɗa, MTHLAKU, ka kumshi asar na ata wutə durayeri na asəndə ngə wa.

⁹Ga an dunawakurərna, antə I akwa wul kəra ga, kamnyar, Hyel, ga an vəi ɗuwardzərna.

¹⁰Hyelərna ku hir ra ka duna antə tsa ata si adzə ra, tsa ata zhar ra kəi wutə sakatə tsa ata nggyari ali dawayeri arna.

¹¹MTHLAKU, ga aɗiya tsi ɗa wa, ta mjirna asə fwari, Kədzantə ɗa ka dunar nga har ka da ndla. Ga an partauwur yeru.

¹²Kamnyar ndər na akwa mnya ɗa an biku, antə ka gə hara ka kər olkur tə da kəgari ni ngkəi ɗa apa dərku, kamnyar nggənggəl su ka thlandər tə da akwa harari ni.

¹³Shamta ɗa kamnyar ɗəffa gə na ɓza adzə ɗa, shamta ɗa karkar. Antə mji ata sənda abbər Hyel an ka kuthlikur akwa Israila, tsuwa kuthlikurərni ni ku ndlətə shanga duniya.

¹⁴Da ana si tahaku tahaku ka kurakər mpa apa kila, ka da kadla akwa kutadi.

¹⁵Da ana kadlər bara susəma apa kila, ka hara kuraku ma da aɗi ndlə wa.

¹⁶Amma I ata hara ha ata kəra dunar nga, I ata hara ha ka kuraku ɗəɗəp ɗəɗəpa kamnyar hirkurər nga na ana palidzə wa. Kamnyar ga an vəi ɗuwardzərna na ka duna, vəi ɗuwardzi akwa sakatə I akwa bwani.

¹⁷I ata fwal nga, kamnyar ga an dunawakurərna, kamnyar, Hyel, ga an vəi ɗuwardzərna, Hyel na hir ra ka duna.