Read bura-pabir Zabura 6 Bible Online

Zabura 6 - bura-pabir bible

Zabura 6

¹Ha ar Dauda aka mdər pwar ha, ka mdə hangkir su tsatsa na ka suwari ncisu. MTHLAKU, ga aɗiya mpa ali kamnyar ɗəffa gə na ɓzə wa, wala ɗi ra sakatə ɗəffa ga ku ɓzi ka duna wa.

²Kara kətadzə ra, MTHLAKU, kamnyar duni ku kətəi! Dunautə ra, kamnyar I ku ghər kamta.

³I akwa ɗar bwani ka duna. Nawa antə su ngəni ata sə kur ri MTHLAKU?

⁴MTHLAKU, ngka ka ra mbantə ra, mbuli ra kamnyar hirkurər nga na ana palidzi wa ni ni.

⁵Kamnyar ma I ku mti, I amzhi ɗangtə ngə kəra wa, wala mzhi hu ngə wa.

⁶I ku ghəri akwa tuwa ka shimwi, tədək viri shimwi ana ləɓantə vəi piyir na, ka ləɓantə sur vətə kəri

⁷I amzhi wutə su karkar kəra wa, kamnyar nci ku kəthla ka duna kamnyar dawayeri arna akwa hara kəi tuwa.

⁸Təra giri kazhar ra, mji ɗimi gapani! Kamnyar MTHLAKU ku nggatə tuwarna.

⁹MTHLAKU ku nggatə tuwarna, tsa ana dlu ali adduwarna.

¹⁰Shanga dawayeri arna ata sə ləkwa səli ka ɗar bwani, aɗi ata fəi wa da ata ngka ka ndzi ka səli.