Read bura-pabir Zabura 60 Bible Online

Zabura 60 - bura-pabir bible

Zabura 60

¹Aka mdər pwar ha, natə ka mdə hara ka kurakər “Kudla ar Alkawal.” Ha laga zum tə Dauda hara kamnyar thlipa aka mda. Tsa rəbutə ha ngəni akwa sakatə tsa akwa mpa ka mjir Aram na ata ɗəffa Siriya na abwar yala, akwa sakatə Yowab ngka ka tsi mjir Edom dəpu kumnya suɗa akwa Mular Una. Hyelər yeru, ɗəffa gə ku ɓzi adzə yeru! Apani ga ku fwari ata kəra yeru, ka vu tə mdə ku səm yeru akwa mpa. Kulini jaktə ngka bu kara dlar yeru.

²Ga an hara tə tsəɗi ni kənggərantədzi ka ntaudzi, kulini dləɓhə ni usa, kwabə tsa kuri huzamtadzi.

³Ga ku hara tə mjir nga ku ɗar bwani ka duna, ka vu yeru akwa mwa wikəwikari apa yeru sa yimər anap.

⁴Ga ku haptə alam aka mji na ana thlivər ɗəffa ga, kamnyar ka da mzhi hwi ta mda shi ɗa ka lali.

⁵Hamta ala yeru amsar adduwar yeru, kara mbantə yeru ka dunar nga, kamnyar ka mji tə gə hir ni msərantədzi.

⁶Hyel ku pəla akwa mbwar vəngkər səli alari abbər, “I ata thləthlau tsəɗi Shekem ka kucali, ka ndəkəmta Mular Sukkoth aka mjirna.

⁷Tsəɗi Gileyad ni arna, japu ka Manasse, Ifrayim an dzakwar liya arna, tsuwa Yahuda an zwal kuthlikurərna.

⁸Mowab ndzi apa tasar kəca arna, I ku pumta ɓaɓiyirna ata kəra tsəɗi Edom, kamnyar ncanta abbər tsa an arna, kəi haptə kurakər nggyari su ata kəra Filistiya.”

⁹Wan ata mwantə ra akwa bərni na akwa katangga nə ri, Hyel? Wan ata pwar ra ka lahar Edom ri?

¹⁰Ga ku nggəlar yeru jirjiri ya? Ga aɗi ata pwar sojayeri ar yeru kəra wa ya?

¹¹Dlar yeru ka yeru nggyari dawayeri ar yeru, kamnyar dlarər mda aɗi ana kuri su wa.

¹²Ka dlarər Hyel, mburu ata səma, tsa ata dlidlirəmta dawayeri ar mburu.