Read bura-pabir Zabura 62 Bible Online

Zabura 62 - bura-pabir bible

Zabura 62

¹Ha ar Dauda aka Yeduthlun, mdə na olər pwar ha. Hyel duku an ka dunar mbantə ra, antə I ata mbwi ɗəffi kəi səkə ni.

²Tsa shini andər mbantə ra ka ɓəlatə ra, tsa andər wulwul kəri antə sur kənggərantə ra aɗi wa.

³Nawa antə giri ata sə zhar pangkərdzi aka mdə duku ka shanga giri pukthlə ni nə ri? Mdə tə tsa aɗi ka duna wa apa katangga na ɓəlɓəlari apa kadaka na akwa kənggəra abaka ndla.

⁴Təng giri akwa bara ka giri kəli ni ata olkurərni, giri ana nggatə msərakur thlandəra. Ata mnya giri, giri ana kiɗə barka aka mda, amma akwa ɗəffa giri, giri akwa shuwumta ni.

⁵Kamnyar Hyel duku antə I ana vəkər ka tsa, antə I ata mbwi ɗəffi kəi səkə ni.

⁶Tsa shini andər mbantə ra ka ɓəlatə ra, tsa andər mbuli ra antə sur kənggərantə ra aɗi wa.

⁷Hyel andər mbantə ra ka ni olkur, Tsa duku an ka dunar ngkamta ali asar, tsa an vəi ɗuwardzərna.

⁸Mjirna, ka giri mbərsa ka Hyel tədəku, ka giri jikaɓəla alari su na akwa damitə giri, kamnyar Hyel an vəi ɗuwardzər mburu.

⁹Shanga mji ndzi apa shambar tə mda ana mpikəmta, mji na ol'ola ka mji na raka raka shang aɗi suma wa. Ma mdə ngkərtə kəgəɓkurər ɗa ata səkel da ata ləmta miu, da ata ndzi kəkaf ta shambar na ana ləɓəla akwa kucira mda.

¹⁰Giri aɗiya dzama abbər giri ata hara gəna atar zambakur wala thla laku wa. Tsuwa wala ma gənar giri an hara hang, giri aɗiya mbərsa kəgari wa.

¹¹Hyel ku pəla gari arni ata bəbal, tsuwa I ku kəɗar nggatari abbər, Hyel gə duku, an ka kuthlikur,

¹²tsuwa gə shinga, MTHLAKU, an ka hirkur na ana palidzə wa. Jiri, ga ata hamta watsəɓa aka kəlara mda kalkal ka kəthlər tə tsa hara.