Read bura-pabir Zabura 65 Bible Online

Zabura 65 - bura-pabir bible

Zabura 65

¹Ha ar Dauda aka mdər pwar ha. Fwal ku dlu nga, Hyel ragai, gə na akwa Sihiyona! Yeru ata nghyaɓəla alkawal tə yeru hara ala ga.

²Shanga mji ata si akəma ga kamnyar ga ana nggatə adduwar mji.

³Wala ma bikayeri ar yeru ku təra duna yeru, ga ana tifəmta ɗa ala yeru shang.

⁴Ga ana vədzə barka aka mji tə ga ku carɓəla mji tə ga ku shahə ɗa ka da ndzi akwa bəbal kutakəyir nga. Yeru ata ndlə ka suayeri na ɓɗakɓɗaku akwa kəyir ngə ni, mbwar vəngkər səli ala gə na ɓɗakkarkar ni.

⁵Hyelər yeru, ga andər mbantə yeru, ga ana hamta ala yeru amsa akwa laku na ata ndatə yeru. Shanga mjir duniya ana vəkər ka ga, wala mji na ciju aɓəla bwanda mandayeri.

⁶Ga an pwi garayeri ka dunar nga, kamnyar gə ka duna jiri.

⁷Ga an thləthlatə ka kuraka mandayeri ni, ka thləthlatə ka mpar yimi, ka kurakər thlentə hangkal ar mjir tsəɗiyayeri.

⁸Apani shanga mjir duniya akwa thlivəra, kamnyar surndatayeri na ol'ola tə gə hara. Ga akwa vu ka shanga mji kucali ka kuraku, baɗita akwa raghəi ka mwanta akwa ramta.

⁹Ga ana wulwul duniya atar hamta alari yimərhyel, ka vu ka tsa ndzi həi na ka kuɓa na ata ya su hang. Ga an nghyantə thlyaghayeri ka yimi ka da hamta mthli aka shanga mji, kamnyar apani antə gə ɗəmha.

¹⁰Ga ana pungkər yimərhyel aka fakə tə mdə ku kukulta, ka vu ka bwarayeri ləɓa ka titilidzi. Ga ana ləɓantə həi ni ka kwandza, ka vu ka sur fakə ptsa ka kəla.

¹¹Ga andər vu ka mdə wutə sur fakə hang akwa tsikəra məva, kəlara bwa tə səla gə ku təramta akwa, susəma ana wutədzi hang.

¹²Vəiɓəlayeri na akwa mtakəu ana ndzi ka kusar hang ka pukdla, tə mjir ɓəla na ata kusar garayeri ana nghyi ka kucali.

¹³Bəri təma ana hartə vəi ɓəla na akwa jijaɓu, ka kuta mular nghyi ka mthli. Shanga ɗa akwa hara har kucali ka kuraku!