Read bura-pabir Zabura 66 Bible Online

Zabura 66 - bura-pabir bible

Zabura 66

¹Aka mdər pwar ha. Har Zabura. Fwal gir Hyel ka kuraku na ola, shanga giri na akwa duniya!

²Hara gir ha kamnyar haptə thləmari fwal gir ni ka ha na ata haptə səliyirni.

³Pəla giri aka Hyel abbər, “Ga ana hara suayeri na ata thlivərantə mda! Jiri, kuthlikurər nga an ola, natə tar ka dawayeri ar ngə thlivər ka zuzurəmta akəma ga.

⁴Shanga mjir duniya ku zuzuri ka da vəngkər səli ala ga, da akwa fwal nga ka hayeri, da akwa fwal thləma ga ka hayeri!”

⁵Sər giri ka giri wutə su tə Hyel hara, sur ndatə tə tsa hara kamnyar mjirni.

⁶Tsa ku shinantə manda tə tsa ndzi di ul'ula, antə mjirni ku ntamta kuta thlyagha ni ka səla ɗa. Ndzi ka mburu hara kucali kamnyar su tə tsa hara.

⁷Kamnyar atar dunarni kuthlikurərni ata ndzi ba saka madi, tsa ana wul kəra tsəɗiyayeri ta maɗashambar asə thlentə hangkalari

⁸Fwal gir Hyelər mburu shanga giri na akwa tsəɗiyayeri ndzi ka shanga mji nggatə kuraka giri akwa fwal ni.

⁹Tsa andər tsəlpi mpika mburu, tsa aɗi zhar mburu ka mburu ndla wa.

¹⁰Kamnyar ga ku ngkərtə yeru, Hyel, ga ku ngkərtə yeru apatə mda ana mbaɓəla adzərfa akwa u'u.

¹¹Ga ku hambwa yeru akwa pərsəna, ka pungkər ala yeru kəlayeri na kəgəɓu ata kəra yeru.

¹²Ga ku zhar tə dawayeri ar yeru ku ntsəntsarəmta yeru, yeru ku mwa akwa u'u ka pərtuwayeri, amma kulini ga ku səntə yeru akwa vəi na lapiya.

¹³I ata səntə saɗaka mbamba akwa mbwar nga, I ata hamta su tə I ku hara alkawalari.

¹⁴I ata hamta ala gə su tə I kətə alkawalər hamtari, sakatə I akwa ɗar bwani.

¹⁵I ata hamta ala gə saɗaka mbamba ka təmayeri na təksətəksari, antə ɗer ar saɗakar gamayeri ni ata ləmta adzə nga. Tsuwa I ata hamta ala gə saɗaka ka gyalayeri kəga kwiyayeri.

¹⁶Asər giri ka giri psi thləm, shanga giri na ana thlivər Hyel, antə I ata pəla ala giri su tə tsa hara ali.

¹⁷I ku tuwa alari ka kuraku abbər ka tsa dlar ra, tsuwa I akwa fwal ni ka hayeri.

¹⁸Ma I an ka tubi ata kəra bikərna wa, sakani MTHLAKU aɗi ata psi thləm ali wa.

¹⁹Amma Hyel ku nggatə ra! Tsa ku psi thləm aka adduwarna.

²⁰I ata hu Hyel, kamnyar tsa aɗi nggəlar adduwarna wa, wala zhar hir ra wa.