Read bura-pabir Zabura 68 Bible Online

Zabura 68 - bura-pabir bible

Zabura 68

¹Ha ar Dauda aka mdər pwar ha. Hara su Hyel, kara titiləmta dawayeri ar nga! Hara ka shanga mji na nggəlar ngə hwi kamnyar thlivər nga.

²Apatə shambar ana fimta ɗer, antə ka gə fimta da, Apatə ndivər ana juwidzi akəma u'u, antə ka kəmanggarayeri dlərɓwamtadzi akəma ga!

³Amma hara ka ɗəffa mji na pwa ndzi msəra ala ɗa, ka da hara kucali akəma ga, ka da fəgəlta kamnyar msərakur ka kucali!

⁴Hara gir ha aka Hyel, ka giri fwal ni, Haptə gir ha aka Hyel na ana mwa ata dlambayeri. Thləmari an MTHLAKU, antə ka giri hara kucali akəmari.

⁵Hyel na akwa vəi ndzəndziyirni na Ɓɗakkarkara, an baba' mutayeri ka mdər ɓəla kughungayeri.

⁶Tsa ana vu ka mji laga duku duku shiɗa ndzi akwa nca mjir kutakəi, ka msərantə pərsənayeri ka da ndzi akwa msərakur ka kucali. Amma tsa ana mwantə mjir kər ɓəɓalkur akwa tsəɗi na kula su.

⁷Hyel ragai, sakatə gə pwar mjir nga, sakatə ga akwa mwa akwa dəli mtakəu,

⁸di ku kənggərantədzi, antə vəi na amtazi ku tər yimi. Gə duku an Hyel na ar Gar Sinai, gə duku an Hyel na Hyelər Israila.

⁹Ga ku hamta yimərhyel hang, ka tsa jaktə namtə tsəɗiyir ngə na hil ni.

¹⁰Antə mjir nga ku həntə kəyir ɗa anda, tə akwa kuta ɓɗakkurər nga, ga ku hamta turər ɗa.

¹¹MTHLAKU ku psəmnya labar səma akwa mpa, antə mwanki hang ku titiləmta labar ni abbər,

¹²“Kuthlyayeri kəga sojayeri arɗa akwa hwi ka təra! Mwanki na avəi ku ndəkəi kariyayeri tə mji ku fata akwa mpa ni.

¹³Wala giri na akwa pi aɓəla akwa sək kəra ciɓər təmayeri, giri ata mzhi hartə kəra giri ka kari dinar ka adzərfa, apatə bukəl ana hartə kərni ka ɓəɓəkari.”

¹⁴Sakatə gə na Hyel na ka Duna ta Shang titiləmta kuthlyayeri na dawar nga, təng da ndzi apa mpur puwa tə shambar titiləmta ata Gar Zalmon.

¹⁵Gar Bashan an gar na ol ka duna, gar na ka jikwarayerari nal nal hang!

¹⁶Kamnyar mə tə gə na gar na ka jikwarayeri nal nal akwa səlkə gar natə gə carɓəla ka tsa ndzi vəi ndzəndziyirni ri? Kamnyar anda antə MTHLAKU ata ndzəndzi ba saka madi!

¹⁷Sakatə gə na MTHLAKU thlata ata Gar Sinai, akwa si akwa vəi ndzəndziyir nga. Gə si ka wagənayeri ar taku dlama dlama, jiri, təng wagənayeri ni dlama dlama daci!

¹⁸Sakatə ga akwa ləmta amta, ga ku fatə mji tə mdə ngkəgəi ɗa ni ka təra ka da, ka dlu cautayeri ba akəla mji na ka kər ɓəɓalkur. Jiri, MTHLAKU na Hyel ata ndzi anda.

¹⁹Fwal gir MTHLAKU, na ana kətə bwaniyir mburu tədək viri, tsa an Hyel na ana mbantə mburu.

²⁰Hyelər mburu, an Hyel na ana mbantə mda, tsa na MTHLAKU na mthlakər mburu an ka dunar msərantə mburu ata mnya mta.

²¹Hyel ata jaɓumta kəra dawayeri arni, mji na ka shishir kəra ɗa saɓəl saɓəl na akwa ləkəma akwa hara biku ni.

²²MTHLAKU pəla, “I ata ngka ka dawayeri ar nga na ahar Bashan, I ata səɓəla ka da akwa kira manda,

²³kamnyar ka giri kəcimta səla giri akwa mamshir ɗa ka kilayeri ar giri nyar mamshir ɗa apatə da akwa barari.”

²⁴Hyelər yeru, yeru ana wutə mwar nga kəga mjir nga ata bəbal, sakatə gə na Hyel na kuthlir yeru akwa mwa apa kuthli, kamnyar mwari akwa vəi ndzəndziyir nga.

²⁵Mjir ha an akəma, ka mjir tsa su abwahili maɗangkwi an akwa daɓwa ɗa akwa tsa kəcaikəcai.

²⁶“Fwal gir Hyel kəlara sakatə giri na mjirni ku tsaptədzi, fwal gir MTHLAKU, shanga giri na kəkar Yakub!”

²⁷Tangkəma nyarmbwar Benjamin an si, nyarmbwa na raka ta shang, kambəla mji na ol'ola akwa nyarmbwar Yahuda kəga mjir ɗa, ka mji na ol'ola akwa nyarmbwar Zebulun ka ar Naftali akwa nu ɗa.

²⁸Ncantə dunar kuthlikurər nga, Hyel, jili duna tə gə ncantə kamnyar yeru waci ni.

²⁹Kuthlyayeri ata sənta ala gə cautayeri, akwa mbwar vəngkər səli ala gə na akwa Urushalima.

³⁰Mnya aka mjir tsəɗiyayeri natə da dawar mburu, mji na ndzi apa mwaɓimtaku na akwa kusar mnya yimi, mji na ndzi apa gyalayeri akwa nca kənayeri. Mpa ala ɗa har tar ma da ku tərghəi kəra da ka si akəma ga ka ɓunja ɗa ata di ka hamta ala ga adzərfa. Titiləmta tsəɗiyayeri na ana bara mpa!

³¹Wakilayeri ar Masar ata si ka cautayeri na ol'ola, mjir Ithliyopiya tsuwa ata sə hamta cautayeri arɗa aka Hyel.

³²Hara gir ha aka Hyel, shanga kuthlikurayeri na akwa duniya Fwal gir MTHLAKU ka hayeri!

³³Hara gir ha alari, tsa na ana mwa ata hyel təng waci, tsa na ana mpəmpa su ka kuraku na ola.

³⁴Psəmnya gir kuthlikurər Hyel aka waskəi, tsa ka səli na ola akwa Israila, vəi na amtazi ana ncantə kuthlikurərni.

³⁵Hyel ragai, ga an sur thlivəra akwa vəi ndzəndziyir nga! Ga an Hyelər Israila na ana hamta kuthlikur ka duna aka mjir nga. Ka huwa ndzi aka Hyel!