Read bura-pabir Zabura 69 Bible Online

Zabura 69 - bura-pabir bible

Zabura 69

¹Ha ar Dauda aka mdər pwar ha, natə ka mdə hara ka kurakər “Kudlayeri.” Mbantə ra, Hyel ragai! Kamnyar mbil raka ka kəri sha akwa yimi.

²I akwa ləghəi akwa maɓu na zurang, vəi aɗi na amzhi rwati ra wa. I ku ndla akwa yimi na zurang, antə pərtu akwa shamta kəri.

³I ku ghəri akwa tuwar bara dlara, har tə wulyi ku uli. Nci ku ghəri akwa sək dlara akəla ga.

⁴Mji na nggəlar ra kula suari aɗi, ku hara hang ta shishir kəri. Mji na akwa bara ka da tsi ra ni da ka duna, da ana thlandər ata kəri. Da vu ra kəi ngka ka su tə I aɗi an həltə wa.

⁵Hyel, ga asəndə cakukur arna, bikərna aɗi ɗuwarɗuwarari ala gə wa.

⁶Mthlaku, ga an MTHLAKU na ka Duna ta Shang, ga aɗiya hara kəi kəli səliyir mji na mbərsa ka gə wa! Ga aɗiya zhar ka mdə rutəmta mjir nu nga kamnyar na wa, ga an Hyelər Israila.

⁷Kamnyar nga antə I ku sa nggənggəla, har tə səli ku ləkwa nci.

⁸I ku ndzi apa mətəpi aka maɗama'na, ka ndzi aka maɗama'na apa dur gapani.

⁹I hir mbwar nga ka duna apa mpikəi, har akwa mba ɗəffi, antə shanga nggənggəl tə mji hara ala ga, da hara ali.

¹⁰Kəlara sakatə I ku tuwa ka hara asham, təng I ata ndzi sur nggənggəla aka mji.

¹¹Kəlara sakatə I ku hatə dasa ka ləkwa tuwa, təng I ana ndzi sur kumshi aka mji.

¹²I ku ndzi sur ngkər aka mji ata kəra laku, har mjir wika ana thlangkər ali ha.

¹³Amma arna, MTHLAKU, I akwa hara adduwa ala ga, ka mbərsa abbər akwa saka na ku ndzi kalkal ala ga, ga ata hamta ali amsari ka mbantə ra, kamnyar hirkurər nga na ana palidzi wa ni.

¹⁴Ntsuɓəla ra akwa maɓu ni, ta I aləghəi ka sha, msərantə ra ta dawayeri arna, kara kəɓəla ra akwa yimi na zurang ni.

¹⁵Ga aɗiya zhar ka pərtu hartə kəri wa, wala kəi satə yimi ka ləghəi akwa kira manda wa, wala ka kul hartə ra apatə mnya mda ana hartədzi wa.

¹⁶Shinau ali, MTHLAKU, kamnyar hirkurər nga ana palidzi wa, shinar kəma ga təbwarna kamnyar kətadzər nga an ola.

¹⁷Ga aɗiya ɗuwar kər nga ali wa, I an buɗar nga, kamnyar I akwa ɗar bwani, antə usa dlar ra taktar!

¹⁸Shahədzi adzə ra kara mbuli ra, msərantə ra ta dawayeri arna.

¹⁹Ga asəndə laku tə I akwa sa nggənggəla akwa, ka laku tə mdə kəli səliyirna ka rutəmta ra akwa, tsuwa ga ku səndə shanga dawayeri arna.

²⁰Hangkur nggənggəl ni akwa mba ɗəffi, tə I aɗi ka sur vəkər shang kəra wa. I dzama abbər I ata wutə mji na ata kətadzə ra, amma təng shwalang, abbər nuhum I awutə mji na ata shiktə ra amma təng tsu shwalang.

²¹Sakatə I ka məi, da na ali gwar ata vəya susəma, sakatə I ka thləli, da ni yimi na mumwasu ata vəya yimər sa.

²²Namtə ka susəmər kucali arɗa ndzi dərku ala ɗa ka kərɗa kəga pazhayeri arɗa.

²³Ndzi ka nca ɗa mbwi kuthlu ta da awutə su, ka kusara ɗa ndzi ghərghərari ba saka madi.

²⁴Pumta ɗəffa gə na ɓzi ni ata kəra ɗa, ka gə ɗi ɗa apa kara tsi ɗa kamnyar bwarbwarkur ɗəffa ga.

²⁵Huzamta kəyayeri arɗa, mda aɗiya mbil akwa di ɗa wala duku wa.

²⁶Kamnyar da akwa jaktə hara bwani aka mji natə ga ku kurtə ɗi ɗa, ka hara kyartəkur aka mji natə ga ku dəkəi ɗa.

²⁷Ɗi ɗa ata kəra kəlara biku tə da hara, ga aɗiya yafitə ɗa wa.

²⁸Fwavumta thləma ɗa akwa kakaɗər mpika, mda aɗiya vu ɗa akwa jikar mji na ɓɗaku wa.

²⁹I akwa ɗar bwani tsuwa dzi akwa kətə ra, antə mbantə ra, Hyel, kara tsəlpi ra!

³⁰I ata hu thləma Hyel ka ha, kəi nar olkur atar usar ni.

³¹Ngəni an ata kəskəra MTHLAKU ka təramta saɗakar thla, ka təramta gyal na ku kəl ol ka duna.

³²Ma sakatə I ku mbantə mjir bwani, ɗəffa ɗa ata ndzi msəra ala ɗa. Antə giri na ana nu Hyel, giri ata wutə sur dunautə giri.

³³Kamnyar MTHLAKU ana psi thləm aka mjir tursu, tsuwa tsa aɗi ana fwari ata kəra mjirni na akwa pərsəna wa.

³⁴Hu gir Hyel, vəi na amtazi ka duniya, mandayeri ka shanga su na akwa da.

³⁵Kamnyar Hyel ata mbantə Urushalima, ka jaktə latə bərniyayeri na akwa Yahuda. Tsuwa mjirni ata ndzəndzi anda ka da ndzi mthlakari,

³⁶kəkayeri ar mjir kəthlər alari asə fa kifər tsəɗi ni, antə mji na ana hir ni ata ndzəndzi akwa.