Read bura-pabir Zabura 7 Bible Online

Zabura 7 - bura-pabir bible

Zabura 7

¹Ha tə Dauda hara aka MTHLAKU ata kəra Kush na mdər Benjamin. MTHLAKU na Hyelərna, I akwa si adzə nga kamnyar ka gə ɗuwar ra, ka gə mbuli ra ta shanga mji na akwa kədlə ra, kara msərantə ra.

²Ma aɗi apani wa, da ata mwantə ra akwa vəi tə mdər msərantə ra aɗi wa, ka da thləthləhumta ra apatə tsəngi ana hara.

³MTHLAKU na Hyelərna, ma I an ku ɓzamtə ɗəffa mda, ma I an ku ɓəli mda aka dawarni,

⁴ma I an ku ntə ɓɗakkur ka ɗimikur aka pazhir na, wala famnya sur dawarna kula suari aɗi.

⁵To ka dawar na kədlə ra ka ngkəi ra, ka tsa ntsəntsartə ra har kəi mta, ka zhar ra akwa bərbər mtəmtari

⁶Thlatə ka ɗəffə bwarbwar, MTHLAKU, kara mpamta ali dawayeri arna na mwavər ni! Thlatə kara dlar ra, ka gə thlamta shariya na kalkalari.

⁷Tsaptə shanga mji adzə nga, ka gə lətə dəkəl kuthlikurər nga na amta.

⁸Ga an Alkaliyir shanga mji. Antə kara hara ali shariya ata kəra jirkur arna na MTHLAKU, kamnyar ga ku sənda abbər I ka jirkur.

⁹Ga ana hara su na kalkal Hyel, tsuwa ga asəndə su na akwa ɗəffa yeru ka nggukər yeru. Antə kara ngkatə mji na kəmanggar ta da ahara ɗimikur, amma ka gə dlar mji na ana hara su kalkal.

¹⁰Hyel, ga an partauwurna, na ana mbantə mji na pwa.

¹¹Hyel ana hara shariya akwa jirkur, ɗəffari ana ɓza ata kəra ɗimikur tədəku.

¹²Ma mdə na aɗi tubi wa, Hyel ata tsələmta katsakarərni. Tsa ku kurtə ɗiɓəla laliyirni.

¹³Tsa ku ɗəmhədzi ka kari mpa arni na mwavər, ka dinggatə afə kuzəku arni na ka thlir.

¹⁴Mji na ɗimi ndzi apa mwala na akwa kutərya ar ɓzər na wuyim, ka na ata thlandəra.

¹⁵Da ana la ku na zurang abbər ka mji ndla akwa, amma da ka kərɗa andər jaktə ndla akwa.

¹⁶Ɗimikur arɗa ana jaktə ngka ata kəra ɗa sur ɗa, da ana ɗəmhə ɗimikur aka mji, ka ɗimikur ni jaktə dəkəi ɗa ka kəra ɗa.

¹⁷I akwa usar MTHLAKU kamnyar tsa ana hara su kalkal, tsuwa I ata fwal MTHLAKU na ka Səli ta Shang.