Read bura-pabir Zabura 71 Bible Online

Zabura 71 - bura-pabir bible

Zabura 71

¹MTHLAKU, I sə bara vəi ɗuwardzi adzə nga, ga aɗiya zhar ra kəi ləkwa səli wa!

²Mbuli ra kara msərantə ra kamnyar ar nga ga ana hara su kalkal. Psi thləm ali, kara mbantə ra.

³Ndzi pela na ola ar ɗuwardzərna, tə I ata mzhi hwi mwari akwa tədəku. Tsawa ka mdə msərantə ra kamnyar gan pela na ola ar ɗuwardzərna, ka kəi ar mbuli ra.

⁴Hyelərna, mbultsə ra akwa tsiya mji na kəmanggar, akwa tsiya mji na ɗimi ka mji na kula kətadza.

⁵Kamnyar MTHLAKU, I ana vəkər ka ga, I ku mbərsa ka ga təng akwa ngkyarkurərna.

⁶I ana mbərsa ka ga təng sakatə I akwa kuta mama'na, ga an kəɓəla ra akwa kuta mama'na lapiya. Apani I ata hu nga tədəku!

⁷Ndzəndziyirna ku ndzi surthlipa aka mji hang, kamnyar ga an vəi ɗuwardzərna na ka duna.

⁸I ana ɓukci akwa fwal nga, ka psəmnya olkur səliyir nga.

⁹Wala akwa halhalkurərna, ga aɗiya nggəlar ra wa, wala ma duni ku kuri, ga aɗiya fwari ata kəri wa.

¹⁰Dawayeri arna akwa mnya ata kəri, mji na akwa bara kəl mpikəi ku ɗəmhə ɗimikur ata kəri,

¹¹Da akwa pəla, “Hyel ku fwari ata kərari. Mbura kədlə ni ka mburu ngkəi ni, kamnyar mdər msərantə ni aɗi wa.”

¹²Hyel, ga aɗiya ndzi ciju ta i'i wa, Hyelərna, mwa taktar usa, kara dlar ra!

¹³Hara ka mji na ana nggənggəl ra ləkwa səli ka da kurəmtadzi, ka mdə kəli səli mji na ana bara dəkəi ra ka da ndzi rutərutari

¹⁴Amma arna, I ata ləkəma ka vəkər ka ga, kəi vərvər fwal nga.

¹⁵I ata ɓukci akwa psəmnya laku tə gə mbantə yeru akwa, ka suayeri tə gə hara kamnyar mbantə yeru, wala tə da ku hara hang ta kəi səndə ɗa cipu.

¹⁶I ata fwal nga mthlaku, gə na MTHLAKU, kamnyar surndatayeri na ol'ola tə gə hara kəi pəla aka mji abbər gə shinga an ka jirkur.

¹⁷Təng tsu akwa ngkyarkurərna, Hyel, antə gə thlipa ali, antə ba ashina I akwa psəmnya kəthlərayeri ar nga na ata ndatə mdə ni.

¹⁸Wala akwa halhalkurərna ka shishi mwapu, Hyel ga aɗiya fwari ata kəri wa! Zhar ra kəi psəmnya dunar nga aka zamanayeri na ata sə si ka kuthlikurər nga aka shanga mji na ata si akəmazi.

¹⁹Kəthlər mbantədzi tə ga ana hara, Hyel ragai, ku mzhitə vəi na amtazi. Ga ku hara suayeri na ol'ola, ai Hyel, mda aɗi tə mda agira ka gə wa!

²⁰Ga an hara tə I akwa ɗar bwani ka duna ni, amma ga an ata jaktə mbantə ra, ga ata ndəkərɓəla ra kazhar kur mta.

²¹Ga ata jaka ali olkur, ka shiktə ra ka damwa.

²²I ata fwal nga ka guləm, kamnyar gə ka jirkur, Hyelərna. I ata hara ha kəi fwal nga ka yakandi, Gə na ɓɗakkarkara ar Israila.

²³I ata haptə kurakəi kamnyar kucali, kəlara sakatə I ata fwal nga, kamnyar ga ku msərantə ra.

²⁴I ata ɓukci akwa ngkər dunar mbantə mda tə gə kəgari, kamnyar shanga mji na bara ka da dəkəi ra, ku ləkwa səli ka tsi mdəkurər ɗa.