Read bura-pabir Zabura 72 Bible Online

Zabura 72 - bura-pabir bible

Zabura 72

¹Ha ar Solaman. Thlipa aka kuthli ka tsa ndzi ka jirkur bu Hyel, ka tsa hara su ka jirkur tsu apa ga.

²Namtə ni ka tsa hara shariya aka mjir nga ka jirkur, ka mjir bwani wutə jirkur akəlari.

³Hara ka garayeri kəga ɗəɗəgəlayeri ya su hang aka mji, kamnyar laku tə kuthli ata hara shanga su ka jirkur.

⁴Hara ka kuthli ndzi mdə na ata mbuli mjir bwani, ka tsa msərantə maɗa' mjir tura, ka hadləmta mji na ana nar bwani aka mji.

⁵I akwa kiɗə ngə Hyel, abbər ka mjir nga thlivər ɗəffa ga ba saka madi, har tar ma pci wala thliya ku zhar hamta parakəu.

⁶Hara ka kuthli ndzi apa yimərhyel na ana təra akwa fakəu, apa kwandza na akwa pughəidzi ata di.

⁷Hara ka ɓɗakkur hara hang akwa sakarni, ka msərakur wutədzi har tar ma thliya ku zhar hamta parakəu.

⁸Ka kuthlikurərni baɗita ata mnya yimi ka tsadza aka mnya yimi, thlata akwa Thlyagha Yufiretis ka tsadza aka datər duniya.

⁹Hara ka mji na akwa mtakəu sə zuzuri akəmari, ka dawayeri arni sə ndla ka pəpəi akəmari akwa bərbər.

¹⁰Hara ka kuthlyayeri ar Tarshish ka na ar ɗəɗəgəlayeri si akəmari ka cautayeri, ka kuthlyayeri ar Sheba ka Seba sənta alari cautayeri.

¹¹Hara ka shanga kuthlyayeri zuzuri akəmari, ka shanga mjir tsəɗiyayeri hara kəthlər alari.

¹²Kamnyar tsa ana msərantə mjir bwani na ku tuwa dlara akəlari, ka mjir tura na kula mjir dlar ɗa.

¹³Tsa ana kətadzə mji na kula duna ka mjir tura, ka mbantə mpika mji na akwa tura.

¹⁴Tsa ana msərantə ɗa akwa bwani ka mpa, kamnyar mpika mjir bwani ka daraja alari.

¹⁵Hara ka far kuthli fəi! Hara ka mjir Sheba hamta alari dinar! Hara ka mdə kiɗa alari Hyel tədəku, ka mdə ɓukci akwa kiɗa alari barka tədəku.

¹⁶Hara ka susəma hara hang akwa tsəɗi ni, ka sur fakə ya hang ba ata kər garayeri, ka mthli ya ka ya apatə ana hara ahar Lebanon, ka bərniyayeri nghyi ka mji apa kusar akwa mtakəu.

¹⁷Hara ka thləma kuthli tuwa har ba saka madi, ka thləmari tuwa ka fəi apatə pci ana mbila tədəku. Hara ka shanga mjir duniya wutə barka atar ni, ka da hu ni abbər tsa mdə na pwa.

¹⁸Hu gir MTHLAKU, na Hyelər Israila! Tsa duku an akwa hara surndatayeri ni!

¹⁹Fwal gir thləmari na ka səli ba saka madi! Ka olkur səliyirni nghyantə shanga duniya. Amin! Amin!

²⁰Ngəni an tsikəra adduwayeri ar Dauda na ɓzər Yesse.