Read bura-pabir Zabura 73 Bible Online

Zabura 73 - bura-pabir bible

Zabura 73

¹Ha ar Asaf. Jiri Hyel ana hara ɓɗakkur aka Israila, aka mji na ka ɗəffa ɗa kəcəkəcari.

²Amma arna, mbil raka səli ata msəra, mbil raka səli ata msər ata vəi vətə səl.

³Kamnyar I ku səlkər mjir kər olkur, sakatə I wutə sur mji na kəmanggar akwa ləkəma.

⁴Kamnyar su aɗi ana damitə dza ɗa wa, da ana ndzi lapiya ndəlang.

⁵Da aɗi ana ɗar bwani apa mji damwa wa, da aɗi ka damitədzi apatə mji damwa kəgari wa.

⁶Kamnyar ngəni da ana ncantə kər olkur arɗa ata bəbal apa gənar wulya, ka namtə mpa apa ləptər ha ala ɗa.

⁷Ndləndləkur ku vu tə nca ɗa akwa təksa ndahwal ndahwal apa ka tərɓəla, antə cakukur an nghyantə kəra ɗa.

⁸Da ana mnya ɗimi ala ɗa ka kumshi ɗa, kamnyar kər olkur tə da kəgari da ana thlivərantə mji abbər da ata hara ala ɗa bwani.

⁹Da ana pəla su na ɗimi ata kəra Hyel na amtazi, ka mwa kəlara kəlara akwa mnya gapangapani akwa duniya,

¹⁰har ka hangkala mji ndəndatədzi ka ngka adzə ɗa, ka mbərsa ka kəlara su tə da pəla.

¹¹Mji na ɗimi ana pəla, “Hyel aɗi ata səndari wa, Na ka Səli ta Shang aɗi ata nggaɓəlari wa.”

¹²Nggədza laku tə mji na ɗimi akwa, tədəku ɗəffa ɗa pəpəipəpəyari tsuwa gənar ɗa akwa jakjaka.

¹³Təng I akwa ghər gapani akwa ndzi ka ɗəffi kəcəkəcari, ka ndzi ka tsi kəcəkəcari kula biku.

¹⁴Tədəku I ana ɓukci akwa ɗar bwani, parang mda akwa ɗi ra ɗəɗəp ɗəɗəpa.

¹⁵Ma I an pəla, “I ata hara gari apani”, sakani I ku səm mdəkur mjir nga.

¹⁶I kiɗa abbər kəi nggaɓəla su ngəni, amma ku ndzi mwavər ali ka duna,

¹⁷tar tə I ləkwa mbwar vəngkər səli ala ga, kambəla I nggaɓəla su na ata sə wutə mji na kəmanggar.

¹⁸Ga ata pu ɗa akwa vəi na lələɓu na ata fa səla mda, antə da ata ndla ka kurəmtadzi cipu!

¹⁹Ga ku shamta ɗa akwa məcikər nca! Thlivər na ɗimi ku kurəmta ɗa ata kəma duku!

²⁰Mji na ɗimi ndzi apa suni tə mda ana fwari ma tsa ku thlata, tsu apani MTHLAKU, antə ga ata fwari ata kəra ɗa ma sakatə ga ku thlata!

²¹Sakatə ɗəffi ɓza, tə su tsəkwar ɗəffi,

²²təng I ləkwa hara su kərəng kərəngnga, kula dzama, I ndzi apa mwaɓi mtakəu akəma ga.

²³Wala apani I ku ndzi kudzəhə ka ga, tsuwa ga ku kəsi ra ka tsi mazəma ga.

²⁴Sauri natə ga akwa ni an akwa pwar ra, tsuwa akwa tsikərari ga ata dlu ra ka mdəkur.

²⁵Wan tə I kəgari amtazi damwa ka təra kəra gə ri? Akwa duniya ma, su aɗi tə I akwa barari ka təra kəra gə wa.

²⁶Wala ma dzi ka kəri aɗi akwa kuri su kəra wa, ga an dunawakurərna, ga antə I carɓəla ba saka madi.

²⁷Kamnyar mji na ku hara ciju ka ga da ata mta, ga ata tsəgəi mji na kula jirkur ala ga.

²⁸Amma arna, kalkal ali kəi ndzi kudzəhə ka ga, I ku carɓəla nga MTHLAKU na ka Duna ta Shang, abbər ga an vəi ɗuwardzərna, antə I ata ngkər aka mji shanga su tə gə hara!