Read bura-pabir Zabura 74 Bible Online

Zabura 74 - bura-pabir bible

Zabura 74

¹Ha ar Asaf natə ka mdə hara ka dzama. Kamnyar mə tə gə pumta yeru apani ri, Hyel ragai? Kamnyar mə tə ɗəffa ga akwa mbu ata kəra mjir ngə ri?

²Ɗangtə mjir nga natə gə ka kəra ga an carɓəla təng waci, dur tə gə pəli ɗa akwa mafakur ka da ndzi mjir nga! Ɗangtə Gar Sihiyona natə hwatu an vəi ndzəndziyir nga.

³Mwari akwa mbwar vəngkər səli ala ga, ga ata wuta abbər dawayeri ni ku huzamta mbwa ni ɗimi ɗimi.

⁴Dawayeri ar nga ku haptə kurakər səma akwa mbwar kəɓar nga ka yeru, ka ncigəmta alamayeri arɗa anda kamnyar ncanta abbər da ku səma.

⁵Da nthləmta nyarmbwa ni ka kəmayeri, apa su tə mjir jaɓ nfwa ana hara akwa mtakəu.

⁶Da kəthlər ka kəma kəga gudəmayeri, ka pupukthləmta shanga udzəm marmara na akwa mbwa ni.

⁷Da hatə u'u ata mbwar vəngkər səli ni ka mbamta tuktukku, ka hilantə vəi hu thləma ga ɗimi ɗimi.

⁸Da pəla, “Mburu ata dlərəmta ɗa karkar!” Antə da mbamta shanga vəi vəngkər səli aka Hyel na akwa tsəɗi ni.

⁹Seɗar ncanta ala yeru abbər ga ata vəi duku ka yeru aɗi kəra wa, naɓi aɗi na mbil kəra wa, tsuwa yeru aɗi səndə sakatə su ngəni ata sə kur wa.

¹⁰Nawa antə dawayeri ata sə zhar kumshi ngə ri, Hyel ragai? Ga ata zhar ɗa ka da ləkəma ka rutə thləma gə ni ba saka madi ya?

¹¹Kamnyar mə tə gə ɓəlhə tsiya ga akwa wul yeru ka nca daci nə ri? Kamnyar mə tə gə haɓəla tsiya ga ka gə kurəmta ɗa wa ri?

¹²Amma Hyel, təng waci ga an kuthlir yeru, ga an mdər mbanta akwa shanga duniya.

¹³Atar dunar nga antə ga ku ndəkəi manda na ola ka bwa suɗa, ka jijaɓumta kəra mwaɓiyayeri na ana thlivərantə mda akwa yimi.

¹⁴Ga an jaɓumta kəra mwaɓi na ola ar kutayimi na ka thləmari Leviyathlan, ka pumta kumərni aka mwaɓiyayeri na akwa mtakəu.

¹⁵Ga an ntuli kucirkila ka thləhumta zərkayeri, ka ulantə thlyaghayeri na ol'ola na ana shiwu wa.

¹⁶Pci ka viri japu ar nga, antə ga ku pwi pci ka thliya akwa vəi ndzəndziyir ɗa zumzum.

¹⁷Ga an thlamta kəla duniya, ga an namtə fakə ka vəya.

¹⁸Amma ɗangtə laku tə dawayeri ar nga ana kumshi ngə, MTHLAKU, laku tə cakwayeri rutəmta nga akwa.

¹⁹Ga aɗiya zhar mpika mjir nga aka dawayeri ar nga na kula kətadzə wa. Ga aɗiya fwari harhar ata kəra mjir nga na akwa ɗar bwani wa.

²⁰Ɗangtə alkawal tə gə hara ala yeru ni. Kamnyar mpa akwa thlata akwa kəlara bwa na ka kuthlu akwa tsəɗi ni.

²¹Ga aɗiya zhar ka mjir bwani ngka avəi ka sur səli wa, amma hara ka mjir bwani kəga mjir tura wutə su tə da ata hu nga ata kər.

²²Mwa taktar, Hyel ragai, ka ra mbuli kər nga! Ɗangtə laku tə cakwayeri ni ana ɓukci akwa kumshi nga tədəku ni.

²³Ga aɗiya fwari ata kəra kuraku tə dawayeri ar nga ana hara ala gə ni wa, tədəku da akwa jakjakə haptə kurakər thlentə hangkal.