Read bura-pabir Zabura 77 Bible Online

Zabura 77 - bura-pabir bible

Zabura 77

¹Ha ar Asaf aka Yeduthlun na mdər pwar ha. I ku tuwa ka kuraku aka Hyel, I haptə kurakəi ola kamnyar ka tsa nggatə ra.

²I ana hara adduwa aka MTHLAKU kəlara sakatə I akwa bwani. Ma aviri I ana haptə tsi ahar hyel akwa adduwa har ka vir kura, amma tsa aɗi ana shiktə ra wa.

³Kəlara sakatə I ɗangtə nga, Hyel, I ana tuwa ka kənggələmta kəri, ma I ləkwa dzama təng dzi ana mta.

⁴Ga ku ngkatə ta heni aləkwa nci, I ku damitədzi ka duna har tə I amzhi gari wa.

⁵I ku dzama ata kəra sakayeri na təramta, ata kəra suayeri na hara waci.

⁶Viri ana kura ali ata kəra dzama na zurang I ku dzama ka yu kərna abbər,

⁷“MTHLAKU ata fwari ta kəri ba saka madi ya? Tsa aɗi ata hir ra kəra wa ya?

⁸Ngəni an tsikəra hirkurər nga na ana palidzə wa ni ya? Ga ata ɓəli alkawalər nga na ba saka madi ni ya?

⁹Ga ku fwari kətadzə mdə ya, Hyel? Ga ata zhar kətadzə mda kamnyar ɗəffa gə na ɓzi ni ya?”

¹⁰Antə I pəla, “Su na nggəlar kuti an abbər, Hyel na ka Səli ta Shang ni aɗi ka duna kəra wa.”

¹¹MTHLAKU, I ata ɗangtə kəthlərayeri ar nga na ol'ol ni, Jiri, I akwa ɗangtə surndatayeri natə gə hara waci.

¹²I ata dzama ata kəra shanga su tə gə hara, kəi dzama ata kəra surndatayeri natə gə hara.

¹³Kəlara su tə gə hara an ɓɗakkarkara, Hyel, haptu aɗi natə mda amzhi gira olkurərni ka gə wa.

¹⁴Ga an Hyel na ana hara surndata, ga ana ncantə dunar nga aka durayeri na gapani.

¹⁵Atar dunar nga antə gə msərantə mjir nga, shanga kəkayeri ar Yakub ka na ar ɓzərni Yusuf.

¹⁶Sakatə manda na ola wutə nga akwa si, Hyel ragai, təng da ləkwa thlivəra, antə kira mandayeri na zurang ku kənggərantədzi.

¹⁷Dlambayeri ku pughəi yimərhyel, hyel ku dləra ka tsa su, antə wurkər hyel ku ndlətə shanga vəi ka mbəlanta.

¹⁸Kuraka tsa su ar nga ana nutə shanga bwa, wurkər nga ana mbəlantə shanga duniya, ka di thlivər ka kənggərantədzi.

¹⁹Ga ana təramta ata kəra manda na ola, ga ana ntamta ɗəffa manda na zurang, amma mda aɗi na amzhi wutə seɗar kur səla gə wa.

²⁰Ga ku nu mjir nga apa mdər ɓəla ka carɓəla Musa ka Haruna ka da pwar ɗa.