Read bura-pabir Zabura 78 Bible Online

Zabura 78 - bura-pabir bible

Zabura 78

¹Ha ar Asaf na kamnyar thlipə ɗəɗukur aka mda. Mjirna, psi giri thləma giri ka giri nggatə surthlipərna, ka giri nggatə su tə I ata pəla ala giri.

²I ata gari ala giri akwa karapu, kəi ngkərɓəla suayeri tə mda aɗi nggaɓəla waci wa,

³suayeri natə yeru ku nggatə ka sənda, suayeri natə kəkayeri ar yeru ku ngkər ala yeru.

⁴Yeru aɗi ata ɗuwar labar ni aka maɗa' yeru wa. Yeru ata ngkər aka zaman na akwa si kəthlərayeri na ol'ola tə MTHLAKU hara, ka jili duna tə tsa kəgari, ka surndatayeri tə tsa hara.

⁵Tsa ku hamta tsawayeri arni aka mjir Israila, natə da an kəkar Yakub. Tsa ku tsawa aka kəkayeri ar mburu na waci, ka da thlipə tsawayeri ni aka maɗa' ɗa

⁶kamnyar ka zaman na ata si sə səndə su nayeri ni, tsuwa ka maɗar tə mda ata sə yaɓəlari akəmazi, sə ngkər aka maɗa' ɗa.

⁷Apani antə da ata mbərsa ka Hyel, ta da asə fwari kəthlərayeri tə tsa hara, amma ka da ɓəlatə tsawayeri arni tədəku.

⁸Apani da aɗi ata sə ndzi apa kəkayeri arɗa na waci wa, kamnyar akwa zamanər ɗa da ku hara kər ɓəɓalkur ka haptə hangkala mda, da aɗi ndzi ka hamta jiri na gyang aka Hyel wa, tsuwa da aɗi nu Hyel ka ɗəffa ɗa duku wa.

⁹Da ndzi apa mjir sha ar tsəɗi Ifrayim wa natə wala tə da kəga lali, da ku shinardzi ka hwi sakatə mdə baɗitə mpa.

¹⁰Mjir Israila ndzi tsu apani kamnyar da ku nggəlar kəsi alkawalər Hyel, da aɗi hir ɓəla tsawurni wa.

¹¹Da fwari su tə tsa hara, ka fwari surndatayeri natə tsa hara ata nca ɗa.

¹²Ata nca kəkayeri arɗa na waci antə tsa hara surndatayeri, akwa mtakər Zowan na akwa tsəɗi Masar.

¹³Tsa ku ntau manda ka vu tə mjirni təramta akwa kutari kasəla, tsa vu tə yimi ni fahədzi ata mnya maghəmayeri ni apa katangga.

¹⁴Ma təpci tsa ana nca ala ɗa laku ka dlamba, ma viri ku hara tsa ana nca ala ɗa laku ka parakər u'u.

¹⁵Tsa ku ntau pelayeri akwa hamada, ka hamta ala ɗa yimi hang apa yimər kucirkila na akwa pu kərni akwa səɓəla.

¹⁶Tsa ku hara tə zərkayeri ku puɓəladzi akwa pela na ola, ka vu tə yimi hwi apa thlyagha.

¹⁷Amma da ku ləkəma ka hara biku aka Hyel, ka namtə ɗəffa ɗa ɓəɓal aka na ka Səli ta Shang akwa mtakə ni.

¹⁸Da akwa ngga mnya Hyel dzakdzakku, abbər ka tsa na ɗa susəma tə da ata barari.

¹⁹Da ku ngkər ndər ɗimi aka Hyel abbər, “Hyel ata mzhi na mburu susəma akwa mtakə ni ya?

²⁰Wala tə tsa ku tsa pela na ola, tə yimi ku hwi səɓəla ka nghyantə zərkayeri, tsa ata mzhi hamta ɗəvə ka səkwar kum aka mjirni ya?”

²¹Apani sakatə MTHLAKU ku nggatə ɗa, ɗəffari ku ɓzi, antə tsa pwa ata kəra mjirni ka u'u, antə ɗəffari ku vərvər ɓza ata kəra ɗa ka duna,

²²kamnyar da aɗi mbərsa ka Hyel wa, da aɗi hamta jiri abbər tsa ata mzhi mbantə ɗa wa.

²³Wala apani tsa ku tsawa aka vəi na amtazi ka tsa mburar nyarmbwarni,

²⁴antə tsa pughəi ala ɗa manna hang ka da kwasa, tsa pughəi ala ɗa mthli na amtazi.

²⁵Apani antə da ku səm susəmər mjirthlentərhyel! Tsa ku thlenta ala ɗa susəm hang ka duna.

²⁶Tsa hara tə shambar na abwar raghəi ni ku fya amta, dunarni ku vu tə shambar ku thlata abwar anəm ka səɓəla.

²⁷Antə shambar ni ku pughəi ala ɗa kum hang apa su tə mda abara wa, tsa sənta ala ɗa ɗikayeri hang apa wuyakər mnya manda.

²⁸Tsa hara tə shambar ni pughəi ɗa ata ɗəffa vəi fəliyir mji ni, ka akwa shanga vəi na kalaktə tentayeri arɗa.

²⁹Antə mji ni ku səma ka ndli, kamnyar tsa ku na ala ɗa su tə da akwa nggukari ni.

³⁰Amma kwabə da akuri səm su tə da akwa nggukərni, tə susəm ni tsu msəra akwa mnya ɗa,

³¹təng ɗəffa Hyel ɓza ata kəra ɗa, ka kurəmta mji na ka duna akwa nca ɗa ka perəmta kustayeri ar Israila ləpəpu ata di.

³²Amma ata kəra shanga su nayeri ni da ləkəma akwa hara biku, ata kəra shanga surndatayeri tə tsa hara ni da aɗi mbərsa ka tsa wa.

³³Apani tsa ku hara tə da kuri ndzəndziyir ɗa gapani, tə da kuri ndzəndziyir ɗa akwa sur nthləhyel.

³⁴Kəlara sakatə Hyel ku kurəmta bwadukwa ɗa, mji na mbila ana bara ni, da ana tubi ka nu ni ka jirkur.

³⁵Da ana ɗangta abbər Hyel an vəi ɗuwardzər ɗa, abbər Hyel na ka Səli ta Shang an mdər mbantər ɗa.

³⁶Amma da akwa pwaktə ni ka ndərayeri na msəra daci, su aɗi tə da pəla na ka jirkur wa.

³⁷Da aɗi ka jirkur alari wa da aɗi ana kəsi alkawal arni wa.

³⁸Amma kamnyar kətadzərni tsa ku tifəmta ala ɗa bikər ɗa, tsa aɗi kurəmta ɗa wa. Tədəku tsa akwa mbwi ɗəffari tsa aɗi ana pumta ɗəffari ata da wa.

³⁹Kamnyar tsa ku ɗangta abbər da kum ka mamshi, da ndzi apa shambar na ana fya ka təramta daci.

⁴⁰Ka yiɗau tə da hara kər ɓəɓalkur alari akwa mtakə nə ri! Ka yiɗau tə da ɓzamtə ɗəffari ri akwa mtakər masali nə ri!

⁴¹Da ku ngkərtə Hyel ata kər ata kər ka thlentə hangkala Hyel na Ɓɗakkarkara ar Israila.

⁴²Da fwari ata kəra dunarni ka vir tə tsa msərantə ɗa akəla dawayeri arɗa,

⁴³ka suayeri na ol'ola tə tsa hara ahar Masar, ka surndatayeri tə tsa hara akwa bəbalər Zowan ni.

⁴⁴Tsa shinantə thlyaghayeri arɗa ka mamshi, kamnyar ta mjir Masar asa yimər zərkayeri arɗa.

⁴⁵Tsa thlentə ciri dlama dlama, antə ciri ni ku hara ala ɗa bwani na mwavər, ka hwamba tsuwa na ku hilantə tsəɗiyir ɗa.

⁴⁶Tsa thlentə ntsəkwa ka da hilantə sur fakər ɗa ka zəmtərviri ka da hilantə yar nfur ɗa.

⁴⁷Tsa hilantə nfur anap arɗa ka handzəkəla, ka hilantə kamndayeri arɗa ka yimərhyel na ana thlarəmta su.

⁴⁸Tsa ku tsəgəi thlar ɗa ka handzəkəla, ka kurəmta ciɓayeri arɗa ka wurka.

⁴⁹Tsa kəlar ɗəffə bwarbwarkurərni ata kəra ɗa, ɗəffari na ɓza ka ɗəffari na mbwa ata kəra ɗa atar thlentə mjirthlentərhyel dlama dlama ka da kurəmta ɗa.

⁵⁰Tsa na laku aka ɗəffari na ɓza, tsa aɗi zhar ɗa ka mpikə wa, amma tsa tsəgəi ɗa shang ka shilku.

⁵¹Tsa tsəgəi shanga maɗashili na yarakəma ar mjir Masar, yarakəmayeri tə da yaɓəla akwa kustakurər ɗa akwa kəyayeri ar Ham.

⁵²Tsa fwaɓəla mjirni apa təmayeri, ka mwa akəma ɗa akwa dəli mtakə na kula su.

⁵³Tsa ku pwar ɗa lapiya kamnyar ta da asə thlivəra, amma manda na ola ku hartə dawayeri arɗa ka kurəmta ɗa.

⁵⁴Tsa səntə ɗa akwa tsəɗiyirni na ɓɗakkarkara ata gar natə tsa ka kərari an dluwa ka dunari.

⁵⁵Tsa kədləmta durayeri damwa akəmta mjirni amzhitə ɗa, tsa ndəkəi tsəɗiyir ɗa apa kifa aka nyarmbwayeri ar Israila, ka hamta kəyayeri arɗa aka mjirni.

⁵⁶Amma wala apani tar tə da ngkərtə Hyel na ka Səli ta Shang, ka hara kər ɓəɓalkur alari, da aɗi kələngkər aka tsawayeri arni wa.

⁵⁷Amma da shinadzə bwahili alari ka ndzi kula jirkur apa kəkayeri arɗa, da ndzi apa afa na mbalmbalari tə mda ambərsa ka tsa wa.

⁵⁸Da thlentə hangkalari atar latə mashiɗayeri ar haptu, ka vu ni akwa səlkər haptayeri.

⁵⁹Apani ɗəffa Hyel ku ɓzi ka duna ata kəra su ngəni, har tə tsa nggəlar mjir Israila ata kəma duku.

⁶⁰Tsa zhar vəi ndzəndziyirni na ahar Shilo, tent natə tsa ana ndzəndzi akwa duniya ni.

⁶¹Tsa zhar tə dawayeri ku dlutsə Akwati Alkawal arni, ka zhar tə seɗar kuthlikur ka səliyirni ləkwa tsiya ɗa.

⁶²Ɗəffari ku ɓzi ata kəra mjirni natə da an mjir fa kifa arni, antə tsa hamta mjirni ka mdə tsəgəi ɗa ka katsakar.

⁶³Tsa ku mbamta maɗadakwiyir ɗa ka u'u ar mpa, antə maɗangkwiyir ɗa aɗi wutə sal ka kəl wa.

⁶⁴Mdə ku tsəgəi pristayeri ka katsakar, ka ngkatə mwankir ɗa ta jikatuwa.

⁶⁵MTHLAKU ku thlata apa tsa thlata akwa heni, apa mdər duna na ku wikə ka yimər anap.

⁶⁶Tsa ku kədləghəli dawayeri arni, tsa ku hara tə da ləkwa səli har ba saka madi.

⁶⁷Tsa ku nggəlar kutakəyir Yusuf, tsa aɗi carɓəla nyarmbwar Ifrayim wa.

⁶⁸Amma tsa carɓəla nyarmbwar Yahuda, ka Gar Sihiyona natə tsa hira.

⁶⁹Tsa həntə mbwar vəngkər səli arni ka duna apa vəi na amtazi, ka nci ni gyang apa duniya na ata ndzi ba saka madi.

⁷⁰Tsa carɓəla buɗarni Dauda, ka kətə ni akwa ɓəla təmayeri.

⁷¹Tsa kətə ni akwa vəi ɓəla təmayeri na akwa hamta uwa aka maɗa' ɗa ka səntə ni, ka namtə ni kuthlir mjir nyarmbwar Yakub, ka tsa pwar mjir Israila natə da an mjirni.

⁷²Dauda ku ɓəla ɗa ka ɗəffari duku, ka pwar ɗa lapiya ka ɗəɗukur.