Read bura-pabir Zabura 79 Bible Online

Zabura 79 - bura-pabir bible

Zabura 79

¹Ha ar Asaf. Hyel, durayeri na gapani ku si akwa tsəɗiyir nga, ka diɓərantə mbwar vəngkər səli ar nga na ɓɗakkarkara, ka huzamta Urushalima tə tsa ndzi bərbər.

²Da ku zhar mshiyir buɗayeri ar nga tə da ndzi susəmər ɗikayeri, mshiyir mji na hir nga antə da zhar aka mwaɓi mtakəu ka da səma.

³Da pumta mamshir mjir nga tə tsa hwi apa yimi tə mamshi ku hwi apa yimi akwa kəlara bwa akwa Urushalima, mda aɗi na mbil ka tsa harəmta ɗa wa.

⁴Yeru ku ndzi sur kyartəkur aka ntəwulayeri ar yeru, sur ruta ka sur kumshi aka durayeri na kalaktə yeru.

⁵Har nawa ri, MTHLAKU? Ga ata kəl ɗəffu ka yeru ba saka madi ya? Ɗəffə bwarbwarkurər nga ata ləkəma ka mbu ata kəra yeru ya?

⁶Pumta ɗəffa ga ata kəra durayeri na aɗi səndə ngə wa, ka ata kəra kuthlikurayeri na aɗi akwa vəngkər səli ala gə wa.

⁷Kamnyar da ku səməmnya nyarmbwar Yakub, ka huzamta vəi ndzəndziyir ɗa.

⁸Ga aɗiya ɗi yeru kamnyar bikər kəkayeri ar yeru wa, Kətadzə yeru kara dlar yeru taktar, kamnyar su aɗi tə yeru amzhi harari kəra wa.

⁹Mbantə yeru, Hyel ragai, kamnyar səliyir thləma ga. Msərantə yeru ka gə tifəmta ala yeru bikər yeru, kamnyar səliyir thləma ga.

¹⁰Kamnyar mə tə durayeri na asəndə ngə wa ana yu yeru abbər, “Hyelər giri ni ama ri?” Ntəmta ɗimikur tə da hara aka mjir kəthlərər ngə ni, ka duniya sənda, kamnyar da ku pumta mamshir mjir kəthlər ar nga.

¹¹Psi thləma ga aka nggyinggyi tə mji na akwa pərsəna akwa harari, ka gə msərantə mji tə mdə ku thlamta ala shariyar mta ka dunar nga.

¹²Ntə ɗimikur aka durayeri na kalaktə yeru ka bwa murfa, MTHLAKU, kamnyar nggənggəla tə da hara ala ga.

¹³Antə yeru na mjir nga, na təmayeri ar ciɓər nga, ata ləkəma ka usar nga har ba saka madi, ka fwal nga akwa shanga zamanayeri.