Read bura-pabir Zabura 80 Bible Online

Zabura 80 - bura-pabir bible

Zabura 80

¹Ha ar Asaf aka mdər pwar ha, natə ka mdə hara ka kurakər “Kudlayeri na ar Mnya Duku.” Psi thləma ga ala yeru, gə na Mdər ɓəla ar Israila, gə na ana pwar durər Yusuf apa ciɓa! Gə na andzəndzi ata dəkəl kuthlikurər nga na ata kəra akwatiyir alkawalər nga, ka gə ncantə kuthlikurər nga.

²Hamta parakər nga aka nyarmbwar Ifrayim, ka Benjamin, ka Manasse. Ncantə dunar kuthlikurər nga, ka gə msərantə yeru!

³Namtə yeru ɓəɓal apa na hwatu, Hyel ragai! Kətadzə yeru, kara mbantə yeru!

⁴MTHLAKU na Hyel na ka Duna, nawa antə ga ata sə zhar kəl ɗəffu ka adduwar mjir ngə ri?

⁵Ga ku ndlantə yeru ka ɗəffə ɓzəɓza, ka na ala yeru kwapə na nghyinghyari ka shimwi ka yeru sa.

⁶Ga ku namtə yeru sur kyartəkur aka tsəɗiyayeri har tə dawayeri ar yeru ana kumshi yeru.

⁷Namtə yeru ɓəɓal apa na hwatu, Hyel na ka Duna ta Shang! Kətadzə yeru, kara mbantə yeru!

⁸Ga ku fwaɓəla yeru akwa Masar apa nfur anap, ka kədləɓəla durayeri damwa ka nci yeru akwa tsəɗiyir ɗa.

⁹Ga ku tsarəmta di kamnyar yeru, antə yeru ku kəla ka hara nggilang ka nghyantə tsəɗi ni.

¹⁰Yeru ku hartə kəra garayeri ka shanggura yeru, ka hartə kəra nfur seda na ol'ola ka tsiya yeru.

¹¹Yeru ku ndərar tsiya yeru har ka mzhitə Manda Meditereniya, nggilanga yeru tsuwa ku mzhitə Thlyagha Yufiretis.

¹²Kamnyar mə tə gə ɓəgələmta katanggar yeru nə ri, har tə shanga mji na akwa təramta ata mnya laku ana ɗəm yar yeru ni?

¹³Gadumtakayeri akwa ɓzamtə yeru, tsuwa shanga mwaɓimtakayeri akwa səm yeru.

¹⁴Jaktə ngka adzə yeru bu, Hyel na ka Duna ta Shang! Haghəi nca ga akwa duniya, kara wul bwani tə yeru akwa, kara wulwul kəra anap ni,

¹⁵nfur anap natə ga an nci ka tsiya ga ni, ɓzər tə gə ka kəra ga an kəlanta ni.

¹⁶Kamnyar dawayeri ku tadərəmta ni ka hangkər alari u'u. Ncantə ɗəffə bwarbwarkurər nga ata kəra ɗa ka gə shamta ɗa

¹⁷Amma ka gə tsəlpi mdə tə ga ku carɓəla, mdə natə ga ku dunautə ni kamnyar kər nga.

¹⁸Antə yeru aɗi ata shinardzi kazhar ngə wa. Mbantə yeru, antə yeru ata vəngkər ala gə səli.

¹⁹Namtə yeru ɓəɓal apa na hwatu, Hyel na ka Duna ta Shang! Kətadzə yeru, kara mbantə yeru!