Read bura-pabir Zabura 81 Bible Online

Zabura 81 - bura-pabir bible

Zabura 81

¹Ha ar Asaf aka mdər pwar ha, natə ka mdə hangkir guləm ar mjir Gath. Hara gir ha ar huwa aka Hyel na an duna mburu, haptə giri kuraku ar kucali aka Hyelər Yakub!

²Haptə gir ha ka giri tsa kəcaikəcai, tsa gir su na msəra ka guləm ka yakandi.

³Mbur giri təmbəl kamnyar kucali sakatə thliya haɗa thlata, ka sakatə thliya tekateka.

⁴Kamnyar ngəni an su tə mdə tsawa aka mjir Israila, tsa an tsawur Hyelər Yakub.

⁵Ngəni an su tə mdə tsawa aka mjir Israila, sakatə da səɓəla kamnyar mpa ka mjir Masar. I nggatə kuraku laga tə I aɗi səndə wa, akwa pela,

⁶“I ku ɗəmi ala giri kəl na ata wulya giri, ka msərantə tsiya giri akwa bwaniyir kəl thlambəl.

⁷Giri ku kəga ra akwa sakar bwani, antə I ku msərantə giri, akwa zhimaru ar ɗuwardzərna antə I ku shinau ala giri. I ku ngkərtə giri ata mnya yimər Meriba.

⁸Psi gir thləm mjirna, kəlara sakatə I akwa tsaktə giri! Mjir Israila, ai kalkal ka giri psi thləm ali!

⁹Giri aɗiya ndzi ka haptu akwa nca giri wa, wala vəngkər səli aka kəlara haptu wa.

¹⁰I an MTHLAKU na Hyelər giri, na fwaɓəla giri kazhar tsəɗi Masar. Kəlar giri mnya giri bau, antə I ata nghyantari ka susəma.

¹¹“Amma mjirna aɗi hir psi thləm ali wa, mjir Israila aɗi akwa bara wutə ra ma wa.

¹²Antə I zhar ɗa ka da ləkəma ka mulmulkur ni, ka da hara su tə da hira.

¹³I bara abbər ka mjirna psi thləm ali, ka mjir Israila nu su tə I pəla.

¹⁴Sakani I ata shamta dawar ɗa kula shamta saka, kəi shinardzi ata kəra dawayeri arɗa.

¹⁵Mji na akwa nggəlar MTHLAKU ata sə zuzuri ka thlivəra akəmari, antə mənggəlari ata sə nu ɗa ba saka madi.

¹⁶Amma I ata hara ka giri səm alkama na ɓɗakta shang, kəi ndlantə giri ka məma na thlata akwa gar.”